15.10.2026 | 18:45
Գևորգ Փարսյանը երրորդ անգամ կպայքարի Կապանի համայնքապետի պաշտոնի համար
ՀՀ ՍԱՊԾ-ն աջակցության առաջարկով դիմել է ՄԱԿ-ի պարենի և գյուղատնտեսության կազմակերպությանը
Տնտեսություն
29.06.2017 | 16:16
Սննդամթերքի անվտանգության ապահովման նպատակով ՀՀ կառավարության ծրագրով նախատեսվում է մինչև 2017 թվականի ավարտը մշակել սննդամթերքի անվտանգության ոլորտում ռիսկերի գնահատման մոդել, իսկ 2018-2021 թվականների ընթացքում ներդնել այն և կիրառել ռիսկերի կառավարման մեխանիզմներ: Այս մասին տեղեկացրին ՀՀ ԳՆ ՍԱՊԾ տեղեկատվության և հասարակայնության հետ կապերի բաժնից:
ՀՀ ԳՆ սննդամթերքի անվտանգության պետական ծառայությունն այս ուղղությամբ համագործակցության ու տեխնիկական աջակցության առաջարկով դիմել է ՄԱԿ-ի պարենի և գյուղատնտեսության կազմակերպությանը (FAO/ՊԳԿ)՝ կարևորելով կազմակերպության փորձն ու փորձագիտական կարողությունները: Ակնկալվում է, որ համագործակցության արդյունքում կբարելավվեն Հայաստանում սննդամթերքի անվտանգության ոլորտում ռիսկերի գնահատման կարողությունները՝ նպաստելով ռիսկերի գնահատման վրա հիմնված պետական վերահսկողության իրականացմանը:
ՀՀ ԳՆ սննդամթերքի անվտանգության պետական ծառայության հրավերով Հայաստանում է գտնվում այս հեղինակավոր կազմակերպության պատվիրակությունը՝ Մերի Քեննի գլխավորությամբ: Որպես աջակցության առաջին քայլ, հունիսի 28-ին կազմակերպվել էր «Սննդամթերքի անվտանգության կարողությունների հզորացում՝ ոլորտի ռիսկերի կառավարման նպատակով» աշխատաժողովը՝ ինչպես Ծառայության, այնպես էլ շահագրգիռ նախարարությունների և կառույցների ներկայացուցիչների մասնակցությամբ:
«Այս առաքելությունը մեծ նշանակություն ունի սննդամթերքի անվտանգության հարցում որակական նոր փուլի անցնելու և ոլորտի զարգացումն ապահովելու տեսանկյունից»,- ողջունելով աշխատաժողովի մասնակիցներին՝ մասնավորեցրել է ՍԱՊԾ պետ Իշխան Կարապետյանը: Ըստ նրա՝ ծրագիրը, որը նախատեսվում է մշակել, մեծապես նպաստելու է ոլորտում ռիսկերի գնահատման մեխանիզմների ներդրմանը, կարողությունների զարգացմանը, ինչպես նաև կառավարման ու վերահսկման հնարավորությունների ընդլայնմանը:
ՊԳԿ փորձագետ Ժան Չարլզ Լեբլանկը ներկայացրել է սննդամթերքի վերահսկողության և ռիսկերի վերլուծության ոլորտներում կիրառվող ժամանակակից միջոցներն ու միջազգային փորձը, ռիսկերի գնահատման սկզբունքներն ու արդյունքների օգտագործման մեթոդները:
Աշխատաժողովի ընթացքում նաև ներկայացվել են սննդամթերքի անվտանգության համակարգի կառավարման՝ մեր երկրի առանձնահատկությունները, ոլորտի օրենսդրությունը, սննդամթերքի անվտանգության հետ առնչվող կենդանիների առողջության հետ կապված հիմնահարցերը: Մասնակիցներն անդրադարձել են նաև ռիսկերի գնահատման և դրա վրա հիմնված ծրագրերի իրականացման համար կարևոր գործառույթներին, ոլորտի բացերին ու մարտահրավերներին, ինչպես նաև հզորացման կարիք ունեցող կարողություններին:
ՊԳԿ փորձագետների հետ հունիսի 26-30-ը տեղի ունեցած աշխատանքային քննարկումների արդյունքում նախատեսվում է մշակել տեխնիկական աջակցության ու կարողությունների զարգացման երկամյա ծրագիր և այդ շրջանակներում բարելավել ռիսկերի գնահատման մեխանիզմները:
