Սերժ Սարգսյանի գործով նիստը կրկին հետաձգվեց. վկան վարակվել է կորոնավիրուսով

Երևան քաղաքի ընդհանուր իրավասության դատարանի Ավան և Նոր Նորք նստավայրում՝ դատավոր Վահե Միսակյանի նախագահությամբ, այսօր կրկին հետաձգվեց ՀՀ երրորդ նախագահ Սերժ Սարգսյանի և «Ֆլեշ» բենզալցակայանների տնօրեն Բարսեղ Բեգլարյանի գործի քննությունը։ Նիստին չէր ներկայացել վկա Հարությունյանը, որի շահերի պաշտպանի խոսքով՝ վերջինս հիվանդ է, տրամադրել է անաշխատունակության թերթիկ և միջնորդել հետաձգել դատական նիստը:

Մյուս վկան՝ Սևան Քոչարյանը, ևս չէր ներկայացել նիստին: Դատավորն ընթերցեց Կոտայքի մարզային ոստիկանության աշխատակիցների կազմած արձանագրությունն առ այն, որ նրան բերման ենթարկելու վերաբերյալ որոշումը կատարելու համար այցելել են Քոչարյանի բնակարան։ Վերջինս ոստիկաններին տեղեկացրել է, որ հիվանդ է կորոնավիրուսով և դատարանին էր ներկայացրել թեստավորման դրական պատասխանը հաստատող փոստաթուղթը։

Հիշեցնենք՝ Սևան Քոչարյանի հարցաքննությունն ընդհատված է, և հիմա փաստացի հնարավոր չի լինում շարունակել այն․ հենց նա է մնչ այդ ցուցմունք տվել Սերժ Սարգսյանի դեմ։ Դատավոր Վահե Միսակյանն ասաց, որ վկաների բացակայությամբ դատական նիստը շարունակվել չի կարող, հարգելի համարեց նրանց բացակայությունն այսօր և հետաձգեց նիստը:

Հիշեցնենք՝ ըստ մեղադրական եզրակացության՝ Սերժ Սարգսյանի կազմակերպմամբ և Բարսեղ Բեգլարյանի դրդմամբ, Սամվել Գալստյանի ու Գևորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամ: Սերժ Սարգսյանին մեղադրանք է առաջադրվել ՀՀ ՔՕ 38-179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացնելը կամ վատնելը։ Երրորդ նախագահն իրեն առաջադրված մեղադրանքը չի ընդունում, նրա պաշտպաններն էլ այս գործընթացը որակում են որպես «քաղաքական հետապնդում»։ Նշենք՝ կորոնավիրուսի հետևանքով մահացել են գործով ամբաստանյալներ Սերգո Կարապետյանը և Սամվել Գալստյանը։ Սերժ Սարգսյանի մեղադրանքի հիմքում հենց Սերգո Կարապետյանի ցուցմունքն էր։

Ռոզա Վարդանյան