Գյումրիում կորոնավիրուսը նորից գլուխ է բարձրացրել, բայց ախտանշաններ ունեցողներից շատերը հրաժարվում են թեստավորվել

Վերջին շրջանում Գյումրիում զգալիորեն աճել է կորոնավիրուսի նոր դեպքերի թիվը։ Հիվանդությունների վերահսկման և կանխարգելման ազգային կենտրոնի Շիրակի մարզային կառույցի տվյալներով սակայն, նմուշառվողների թիվը մեծ չէ, հետևաբար՝  իրավիճակը հստակ վերլուծել հնարավոր չէ։ Ըստ մասնագետների, նմուշների թիվը պետք է մեծ լինի, որպեսզի հնարավոր լինի վերլուծել ու հստակ գնահատական տալ վիրուսի տարածման մասշտաբներին։

«Օր կա,ասենք, 45 հոգի է նմուշառվում, օր կա՝ 25, օր էլ կա՝ 15, անկանխատեսելի է։ Օր կա 25 նմուշառվողներից 10- ի մոտ է դրական, օր կա՝ 5-ի մոտ։

Հիվանդության ընթացքը հիմնականում թեթև է, մի երկու ժամ կամ մի օր ջերմություն են ունենում՝ առանց թոքաբորբի, առավելագույնը 5-7 օր հետո առողջանում են։ Այս ընթացքում չունենք վերակենդանացման բաժանմունքում գտնվող հիվանդներ, երկկողմանի թոքաբորբով հիվանդներ։

Ընթացքը թեթև է, սակայն նորից եմ կրկնում, նմուշների թիվն է քիչ, չես հասկանում ինչո՞ւ չեն թեստավորովում, հատկապես երբ անվճար է ու պիտի դիմեն պոլիկլինիկաներ։ Նախարարի հրաման կա, որ սուր շնչառական հիվանդությամբ վարակվածներից յուրաքանչյուրը  պիտի թեստավորվի, բայց արդյունքում չեն թեստավորվում։ Պիտի թեստավորվեն, թեստը ուղարկեն մեզ։ Թեստերի խնդիր չունենք, ապահովված ենք, բայց թեստավորվողների քանակը սակավ է», -պարզաբանեցին Հիվանդությունների վերահսկման և կանխարգելման ազգային կենտրոնի Շիրակի մարզային կառույցից։

Գյումրի բժշկական կենտրոնի փոխտնօրեն Արմեն Խաչատրյանն էլ ասաց, որ հիվանդանոցի տրիաժ ծառայությունը գործում է, բայց հիվանդների թիվը մեծ չէ։

Արմիկ Մովսիսյան