07.10.2026 | 23:48
Արթուր Դանիելյանը կալանավորվեց
Ինչո՞ւ է Ջալալ Հարությունյանի լուսանկարը հեռացվել ՊՆ կայքից. գերատեսչությունը մեկնաբանություն չունի
03.09.2022 | 14:54
Երեկ ՀՀ ՊՆ Վազգեն Սարգսյանի անվան ռազմական համալսարանում տեղի է ունեցել ՀՀ ՊՆ ռազմաուսումնական հաստատությունների 2022 թ․ շրջանավարտների ավարտական հանդիսավոր միջոցառումը։ Միջոցառմանը մասնակցել են ՊՆ բարձրաստիճան պաշտոնյաներ, այդ թվում նաև Արցախի հերոս, ՀՀ ՊՆ ռազմական վերահսկողական ծառայության պետ Ջալալ Հարությունյանը։ Պաշտպանության նախարարությունը միջոցառման մասին պաշտոնական հաղորդագրություն և լուսանկարներ էր տարածել, որտեղ նախարար Սուրեն Պապիկյանն ու Ջալալ Հարությունյանը նույն լուսանկարում են։
Կարճ ժամանակ անց, սակայն, նախարարության պաշտոնական էջերից հեռացվել են Պապիկյանի ու Ջալալ Հարությունյանի լուսանկարները, ինչը համընկավ Քննչական կոմիտեի` Ջալալ Հարությունյանին առաջադրված մեղադրանքների մասին պաշտոնական հաղորդագրության տարածման հետ։ Միաժամանակ հայտնի դարձավ, որ կասեցվել են Ջալալ Հարությունյանի լիազորությունները։
Factor.am-ը երեկ ամբողջ օրվա ընթացքում ՊՆ֊ից փորձեց մեկնաբանություն ստանալ, թե ինչու է լուսանկարը հեռացվել, արդյո՞ք դա պայմանավորված է հարուցված քրգործով։ Գերատեսչության խոսնակ Արամ Թորոսյանը քիչ առաջ փոխանցեց, որ այս մասով մեկնաբանություն չունեն։
Թորոսյանի փոխանցմամբ` Ջալալ Հարությունյանի լիազորությունները միջոցառման պահին կասեցված չեն եղել։
Հարցին` արդյո՞ք Սուրեն Պապիկյանը կամ պաշտպանական գերատեսչությունը քրգործի վարույթի մասին տեղյակ եղել են, Արամ Թորոսյանը բացասական պատասխան տվեց։
Հիշեցնենք` երեկ ՔԿ֊ն հայտնեց, որ Ջալալ Հարությունյանը 44֊օրյա պատերազմի ընթացքում իր պարտականությունները պատշաճ չի իրականացրել, ինչը հանգեցրել է մարդկային, տարածքային և նյութական կորուստների։
Նարեկ Կիրակոսյան
