16.12.2025 | 23:30
Հաագայում 35 երկիր ստորագրել է Ուկրաինային փոխհատուցման համար միջազգային հանձնաժողովի ստեղծման կոնվենցիան
Էրդողանը վտանգում է Թուրքիայի վարկային վարկանիշը. Bloomberg
Քաղաքականություն
22.05.2018 | 16:06
Միացյալ նահանգների «Bloomberg» լրատվական գործակալությունը Թուրքիայի վերաբերյալ վերլուծություն է հրապարակել։ «Էրդողանը վտանգի է ենթարկում Թուրքիայի վարկային վարկանիշը» խորագրով հոդվածում անդրադարձ է կատարվել միջազգային շուկայում թուրքական կապիտալի վիճակին. տեղեկացնում է ermenihaber-ը:
«Թուրքիան պետական պարտատոմսերի համար ավելի շատ տոկոսներ է վճարում, քան Սենեգալը՝ չնայած այն հանգամանքին, որ նրա վարկային վարկանիշը շատ ավելի բարձր է, իսկ տնտեսությունը՝ 60 անգամ ավելի հզոր։
Սակայն ո՞րն է դրա պատճառը։ Վերլուծաբանները համոզված են, որ պատճառը Էրդողանի վերաբերմունքն է տնտեսության նկատմամբ», -ասված է հոդվածում։
Նախորդ շաբաթ «Bloomberg»-ի հետ հարցազրույցի ժամանակ Թուրքիայի նախագահը հայտարարել էր, որ երկրում ինֆլյացիայի բարձր մակարդակը պայմանավորված է տոկոսադրույքների բարձր լինելով։ Էրդողանի այս հայտարարությունից հետո Թուրքիայի պետական պարտատոմսերի վաճառքները կտրուկ աճել են։ Նույն հարցազրույցի ժամանակ Էրդողանը կարծիք էր հայտնել նաև, որ հունիսի 24-ի ընտրություններից հետո ինքն ավելի մեծ դերակատարություն կունենա երկրի ֆինանսական քաղաքականությունում։
Բրիտանացի վերլուծաբան Օքան Աքընը «Bloomberg»-ի հետ զրույցում հետևյալ մեկնաբանությունն է արել․ «Էրդողանի՝ Կենտրոնական բանկի վերաբերյալ խոսքերը դագաղի վերջին մեխն էին։ Այս պահին Թուրքիայի վարկային վարկանիշը գնահատվում է «B-» մակարդակում։ Իսկ Թուրքիայի պետական պարտատոմսերը հատկապես վերջին շաբաթների ընթացքում բացասական կերպով տարբերվում են այլ զարգացող երկրների շուկայական գներից»։
