Փաշինյանի և Ալիևի նոր հանդիպման արդյունքները․ խաղաղություն, բայց ի՞նչ գնով. ՏԵՍԱՆՅՈւԹ

Բրյուսելում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը, որն ընթացել է Եվրոպական խորհրդի նախագահ Շառլ Միշելի մասնակցությամբ, շուրջ չորս ժամ է տևել։

Նիկոլ Փաշինյանը միայն Կառավարության նիստի վերջում խոսեց Ալիևի հետ հանդիպումից, շատ կարճ․ «Քննարկումը ծավալուն է եղել, քննարկումը հեշտ չէր, բայց ես ուզում եմ արձանագրել, որ մեր նպատակադրումը պիտի շարունակի մնալ ՀՀ Կառավարության որդեգրած խաղաղության օրակարգը, և այստեղ էլ մեզ վճռականություն է անհրաժեշտ՝ այս օրակարգը կյանքի կոչելու համար։ Մենք պետք է բոլորս հասկանանք, որ դա հեշտ չէ, պարզ չէ, հնարավոր լուծումներն էլ ակնհայտ չեն, մենք պետք է շարունակենք հետևողական աշխատել»։

Փաշինյանն ու Ալիևը 44-օրյա պատերազմից հետո հանդիպել են 5 անգամ, մեկը՝ Ռուսաստանում՝ Պուտինի միջնորդությամբ, չորսը՝ Բրյուսելում՝ Շառլ Միշելի միջնորդությամբ։ Ըստ ՀՀ վարչապետի մամուլի ծառայության՝ պայմանավորվածություն է ձեռք բերվել արտգործնախարարների մակարդակով շարունակել «առարկայական բանակցությունները խաղաղության պայմանագրի նախագծի մշակման շուրջ»։

Մեկ ամսվա ընթացքում կհանդիպեն Արարատ Միրզոյանն ու Ջեյհուն Բայրամովը, իսկ նոյեմբերին՝ Նիկոլ Փաշինյանն ու Ջեյհուն Բայրամովը։ Ադրբեջանի նախագահականը չի նշել պայմանավորվածության մասին, սակայն Բրյուսելից առաջ Ալիևի օգնական Հիքմեթ Հաջիևն էր հայտարարել, թե Ադրբեջանը հույս ունի, որ օգոստոսի 31-ի հանդիպմանը կհամաձայնեցվի Ադրբեջանի և Հայաստանի միջև խաղաղության համաձայնագրի տեքստի նախապատրաստման աշխատանքային խմբի ստեղծումը։

Երևանը այս հարցը չի մեկնաբանել ո՛չ Բրյուսելից առաջ, ո՛չ հանդիպումից հետո։ Ի՞նչ սկզբունքների շուրջ են տեղի ունենում Հայաստանի և Ադրբեջանի միջև բանակցությունները, և ինչքանո՞վ է հավանական խաղաղության պայմանագրի կնքում։ Factor TV-ի տաղավարում այս թեմայով հրավիրված քննարկմանը մասնակցում են ազգային անվտանգության և ռազմական հարցերով փորձագետ, քաղաքական գիտությունների դոկտոր Հրաչյա Արզումանյանը, ադրբեջանագետ, նախկին պատգամավոր Տաթևիկ Հայրապետյանը, «Վերադարձ դեպի Դիզակ» ՀԿ գործադիր տնօրեն Մարգարիտա Քարամյանը,  Միջազգային և անվտանգության հարցերի հայկական ինստիտուտի ասոցացված փորձագետ Դավիթ Ստեփանյանը և քաղաքական վերլուծաբան Արմեն Հովհաննիսյանը։