Բրյուսելում մեկնարկել է Փաշինյան-Միշել-Ալիև եռակողմ հանդիպումը. ՏԵՍԱՆՅՈՒԹ

Բրյուսելում մեկնարկել է Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի 4-րդ հանդիպումը: Շառլ Միշելի միջնորդությամբ եռակողմ ձևաչափով առաջին հանդիպումը տեղի էր ունեցել 2021 թվականի դեկտեմբերի 14-ին, երկրորդը՝ 2022 թվականի ապրիլի 6-ին, երրորդը՝ 2022 թվականի մայիսի 22-ին։

Վարչապետ Փաշինյանը դեռ երեկ էր մեկնել Բելգիայի մայրաքաղաք։ Մինչ այդ Եվրոպական խորհրդի նախագահը  հեռախոսազրույցներ էր ունեցել ՀՀ-ի և Ադրբեջանի ղեկավարների հետ։ Կողմերը կարևորել էին երկխոսության շարունակականությունը և հույս հայտնել, որ բանակցությունները կլինեն արդյունավետ: ՀՀ պաշտոնական աղբյուրները առայժմ չեն հրապարակում հանդիպման օրակարգի մանրամասները։ Մինչդեռ Ադրբեջանի նախագահի օգնական Հիքմեթ Հաջիևը հայտարարել էր, թե Բրյուսելում օգոստոսի 31-ին նախատեսված Փաշինյան-Ալիև հանդիպմանը կքննարկվի խաղաղության համաձայնագրի նախապատրաստման համար աշխատանքային խումբ ստեղծելու հարցը։ «Հիքմեթ Հաջիևի ասածը չեմ կարող մեկնաբանել, քանի որ չունեմ նման տեղեկություն։ Սպասենք հանդիպման ավարտին և քննարկված հարցերի վերաբերյալ տեղեկատվություն կտրվի»,- Factor TV-ին ասել էր վարչապետի աշխատակազմի տեղեկատվության և հասարակայնության հետ կապերի վարչության պետ Արմեն Խաչատրյանը։ Հայաստանի և Ադրբեջանի ղեկավարների նախորդ հանդիպումը ևս տեղի էր ունեցել Բրյուսելում մայիսի 22-ին:  Պայմանավորվածություն էր ձեռք բերվել սահմանազատման և սահմանագծման հանձնաժողովների հանդիպում կազմակերպել,  հրապարակվել էր հանձնաժողովների կազմը, ինչին հաջորդել էր հանձնաժողվները ղեկավարող Հայաստանի և Ադրբեջանի փոխվարչապետներ Մհեր Գրիգորյանի և Շահին Մուստաֆաևի առաջին հանդիպումը հայ-ադրբեջանական սահմանին՝ Երասխի ուղղությամբ:

Ի՞նչ սպասել Փաշինյան-Ալիև-Միշել արդեն 4-րդ եռակողմ հանդիպումից․ այս թեմայով դիտեք նաև  Factor TV-ի ռեպորտաժը։