16.02.2026 | 20:15
Ովքեր են ՔՊ-ում ամենաՉսիրվածները. վարկանիշային քվեարկության առաջին փուլի արդյունքը. ՏԵՍԱՆՅՈՒԹ
ԱՄՆ-ը և Թայվանը պաշտոնական առևտրային բանակցություններ կսկսեն
Քաղաքականություն
18.08.2022 | 15:17
Չինաստանի և ԱՄՆ-ի հարաբերությունները, որոնք արդեն լարվել են Թայվան ԱՄՆ պաշտոնական այցերից հետո, սպառնում են է՛լ ավելի վատթարանալ, քանի որ Վաշինգտոնի և Թայբեյի վարչակազմերը հինգշաբթի՝ օգոստոսի 18-ին հայտարարել են, որ երկկողմ համագործակցության ընդլայնման նոր նախաձեռնության մասին պաշտոնական առևտրային բանակցությունները կսկսեն արդեն «աշնան սկզբին»։ Կողմերը կխորացնեն հարաբերություններն առևտրի և ներդրումների ոլորտում, հայտնել են Առևտրի հարցերով ԱՄՆ հատուկ ներկայացուցիչ Քեթրին Թայի գրասենյակից, գրում է DW-ի ռուսական ծառայությունը։
Պեկինը Թայվանը համարում է միասնական Չինաստանի մաս և կտրականապես դեմ է Թայբեյի հետ այլ երկրների պաշտոնական շփման ցանկացած ձևին: ԱՄՆ-ի և Թայվանի միջև սպասվող առևտրային բանակցությունների մասին լուրերի ֆոնին Չինաստանի Արտաքին գործերի նախարարությունը կտրականապես դեմ է արտահայտվել ցանկացած պաշտոնական համաձայնագրի, որը կարող է հետևանքներ ունենալ Չինաստանի ինքնիշխանության վրա:
Չինաստանի և ԱՄՆ-ի հարաբերությունները կտրուկ վատթարացել են ԱՄՆ Կոնգրեսի Ներկայացուցիչների պալատի նախագահ Նենսի Փելոսիի՝ վերջերս Թայվան կատարած այցի պատճառով։ Դա ամերիկյան կողմի ամենաբարձրաստիճան այցն էր Թայվան քառորդ դարի ընթացքում: Փելոսին երրորդ տեղն է զբաղեցնում ԱՄՆ քաղաքական հիերարխիայում՝ նախագահից և փոխնախագահից հետո։
Դրանից անմիջապես հետո ԱՄՆ կոնգրեսականների պատվիրակությունն այցելեց Թայվան:
Պեկինը տեղի ունեցողը սադրանք է անվանել և որպես ուժի ցուցադրում՝ վերջին տասնամյակների ամենամեծ զորավարժություններն անցկացրել՝ կիրառելով օդային և ծովային շրջափակում և նմանակելով Թայվանի զինված գրավումը։ Չինաստանը ձգտում է վերադարձնել Թայվանն իր լիակատար վերահսկողության տակ և սպառնում է, հարկ եղած դեպքում, վերադարձնել այն ուժով։ Միևնույն ժամանակ, ԱՄՆ-ը պարտավորվել է պաշտպանել Թայվանը։
Տաթև Ֆռանգյան
