Եթե ՊԲ-ն ցրվի, Արցախի բնակչությունը դուրս կգա․ սա ավելի վտանգավոր է, քան ճանապարհի փոփոխությունը․ Արեգ Քոչինյան․ ՏԵՍԱՆՅՈՒԹ

Արցախում ստեղծված իրավիճակի, Հայաստանի անելիքների և հարակից թեմաների մասին Factor TV-ն զրուցել է Անվտանգային քաղաքականության հետազոտական կենտրոնի նախագահ Արեգ Քոչինյանի հետ

-Պարո՛ն Քոչինյան, զրույցը սկսենք Բերձորից, Աղավնոյից, որտեղ ժամկետ է տրված բնակիչներին՝ դուրս գալու համար։ Հայկական կողմը՝ և՛ Արցախում, և՛ Երևանում, արդյո՞ք արել է ամեն ինչ, որ այս օրվան չհասներ։

-Դեռևս նոյեմբերի 9-ի հայտարարությունից էր պարզ, որ այս օրը գալու է։ Այսինքն՝ բոլոր մարդիկ, որ պնդում են, թե նոյեմբերի 9-ից չի բխում, որ այս բնակավայրերը պետք է հանձնվեն և ճանապարհի փոփոխություն պետք է տեղի ունենա, առնվազն մի քիչ լավ չեն պատկերացնում, թե ինչպես են աշխատում միջազգային պայմանագրերը, և թե ինչ վիճակում ենք մենք գտնվում։

Ես ասեմ ավելին։ Սա, ըստ էության, նոյեմբերի 9-ի հայտարարության վերջին կետը չէ, որին մենք բախվում ենք, և որը հարցեր կամ դժգոհություններ է առաջացնում Հայաստանում և Արցախում։ Մենք լսում ենք ադրբեջանական կողմի հայտարարությունները՝ կապված այդ հայտարարության 4-րդ կետի հետ, որ, ըստ էության, Պաշտպանության բանակի ցրումն է։ Եթե Պաշտպանության բանակը ցրվում է, դա նշանակում է, որ Արցախում հայկական բնակչությունը սկսում է դուրս գալ, որովհետև այնտեղ չի մնալու հայկական բնակչություն, եթե չլինեն ինքնապաշտպանական ուժեր։ Այ սա՛ է ավելի լուրջ և ավելի էական վտանգ, քան ճանապարհի փոփոխությունն է։

-Նույն տեքստում կա նաև գերիների վերադարձի հարց։

-Իհարկե, շատ լավ օրինակ՝ հստակ կետ է, որ գրված է, որ գերիները պետք է վերադարձվեն։ Եվ անգամ միջնորդն է, ըստ էության, թռնում այդ կետի վրայից, երբ ասում է, որ այնտեղ գրված չէ, որ հետո գերի վերցրածները և այլն։

Ճանապարհի հետ կապված մեկ այլ ավելի լուրջ խնդիր կա, որ դեռ լրջորեն չի էլ խոսվում։ Ես մտավախություն ունեմ, որ երբ նոր ճանապարհը սկսի օգտագործվել և գործածվել, ադրբեջանցիներն այդտեղ միանգամից մաքսակետ են դնելու կամ անցակետ ու իրագործեն Ալիևի սպառնալիքը, որ նոր ճանապարհն ունենալու է նույն կարգավիճակը, ինչ կունենա ճանապարհը Մեղրիում, ինչը գործնականում ադրբեջանցիներին թույլ կտա շրջափակել Արցախը։

Հարցազրույցն ամբողջությամբ՝ տեսանյութում։

Գարիկ Հարությունյան