Գարեգին Չուգասզյանը հացադուլը չի դադարեցրել

«Հիմնադիր խորհրդարանի» նախագահ Գարեգին Չուգասզյանը հացադուլը չի դադարեցրել: Այս մասին Factor.am-ին տեղեկացրեց «Հիմնադիր խորհրդարան» մամուլի պատասխանատու Սյուզան Սիմոնյանը:

Հարցին՝ «Սասնա ծռերի» աջակիցները անսալով ՀՀ վարչապետ Նիկոլ Փաշինյանի կոչին ապաշրջափակեցին Արշակունյաց պողոտան, արդյոք Գարեգին Չուգասզյանն էլ չի՞ փոխի իր որոշումը ու հացադուլը դադարեցնի, պատասխանեց. «Չուգասզյանը հայտարարել է, որ մինչև վերջ է գնալու»:

Իսկ թե ինչպես է իրեն զգում արդեն 23 օր հացադուլ հայտարարած Չուգասզյանը, արդյոք հացադուլի ժամկետը չի մոտենում վտանգավոր սահմանագծին, Սյուզան Սիմոնյանը խոստացավ պատասխանել քիչ ավելի ուշ, երբ կայցելի նրան:

Հիշեցնենք, որ ապրիլի 24-ին Գարեգին Չուգասզյանը դուրս էր եկել ընդհատակից ու ձերբակալվել: Նույն օրը նա անժամկետ հացադուլ էր հայտարարել՝ պահանջելով, որ.

«Արմեն Սարգսյանի գլխավորած Հայաստանի գործող ադմինիստրացիան, մինչև սույն թվականի մայիսի 27-ը, անհապաղ նախաձեռնի Հայաստանի բանտերում գտնվող բոլոր քաղբանտարկյալների օր առաջ ազատման գործընթացը,

Սույն թվականի մայիսի 28-ի Հայաստանի առաջին հանրապետության անկախության հարյուրամյակի կապակցությամբ հայտարարվի այնպիսի լայն համաներում, որը ունակ լինի հաղթահարելու արատավորված արդարադատության համակարգի կողմից առաջացած սոցիալական դժգոհությունը և հիմքեր ստեղծի արդարադատության համակարգի նկատմամբ հավատի վերականգնման համար.

Ստեղծվի անցումային արդարադատության հանձնաժողով. որը կզբաղվի ռեժիմի գործած հանցագործությունների, ինչպես նաև նրա դեմ պայքարի ընթացքում զոհված քաղաքացիների հետ կապված քննությունների իրավաքաղաքական լուծումների որոնմամբ»:

Մայիսի 11-ին Արարատ Միրզոյանի և Լենա Նազարյանի միջնորդությամբ Չուգասզյանը ազատ էր արձակվել, սակայն հացադուլը չէր դադարեցրել:

Հացադուլը դադարեցնելու կոչով նրան էին դիմել նաև «Սասնա ծռերի»  անդամներ Արայիկ  Խանդոյանն ու Աշոտ Պետրոսյանը, սակայն Չուգասզյանը, կարծես անդրդվելի է: