19.12.2025 | 18:11
Երեք ռուս սահմանապահներ հատել են Էստոնիայի սահմանը և 20 րոպե մնացել երկրում
Պաշտոնական Բաքուն պատասխանել է ՀՀ ԱԳՆ հայտարարությանը
Քաղաքականություն
04.08.2022 | 13:15
Ադրբեջանի ԱԳՆ-ն արձագանքել է ՀՀ ԱԳՆ-ի՝ նախօրեի հայտարարությանը՝ հերթական անգամ խեղաթյուրելով փաստերն ու իրականությունը։
Բաքուն, իհարկե, Հայաստանին է մեղադրել նոյեմբերի 9-ի եռակողմ հայտարարության խախտման մեջ, չնայած Ադրբեջանի ՊՆ-ն ինքն էլ փաստել է, որ հարձակում է իրականացրել Արցախի վրա։
«Մենք բազմիցս հայտարարել ենք, որ Հայաստանը չի կատարել երեք երկրների ղեկավարների կողմից ստորագրված 2020 թվականի նոյեմբերի 10-ի հայտարարության դրույթները, մասնավորապես, որ հայկական զինված ստորաբաժանումները դեռ դուրս չեն բերվել ադրբեջանական տարածքներից։ Եռակողմ հայտարարության 4-րդ հոդվածի համաձայն՝ Ռուսաստանի Դաշնության խաղաղապահ զորախումբը տեղակայվում է հայկական զինված ուժերի դուրսբերմանը զուգահեռ»,- ասվում է Ադրբեջանի ԱԳՆ հայտարարության մեջ։
Հավելենք, որ Լեռնային Ղարաբաղում ՀՀ զինված ուժեր չկան, իսկ Արցախի անվտանգությունն ապահովում է ԱՀ Պաշտպանության բանակը, որի կազմալուծման մասին եռակողմ հայտարարության մեջ որևէ դրույթ չկա։
Լաչինի միջանցքի մասին Ադրբեջանի ԱԳՆ-ն նշում է, որ, իբր, դրա երկայնքով «նոր ճանապարհի կառուցումը երկար ամիսներ շարունակվում է համաձայնեցված ճանապարհով և հայկական կողմը բավականաչափ տեղեկացված է»։
Հիշեցնենք՝ ՀՀ ԱԳՆ-ն հայտարարել էր, որ ինչպես հստակ սահմանում է նոյեմբերի 9-ի հայտարարությունը՝ կողմերի (այսինքն՝ Ռուսաստանի Դաշնության, Հայաստանի Հանրապետության և Ադրբեջանի Հանրապետության) համաձայնեցմամբ առաջիկա երեք տարվա ընթացքում է որոշվելու Հայաստանի հետ Լեռնային Ղարաբաղի կապն ապահովող Լաչինի միջանցքով երթևեկության նոր երթուղու կառուցման պլանը, ռուսական խաղաղապահ զորակազմի հետագա վերատեղաբաշխմամբ՝ այդ երթուղու պահպանության համար:
«Ընդգծում ենք, որ մինչ օրս եռակողմ ձևաչափով հաստատված նման պլան չկա և եռակողմ հայտարարության բոլոր կողմերին կոչ ենք անում հավատարիմ մնալ իրենց կողմից ստանձնած պարտավորություններին, անհապաղ ջանքեր գործադրել նոյեմբերի 9-ի հայտարարությամբ հաստատված պայմանների իրագործման, ներառյալ՝ հրադադարի ռեժիմի պահպանման, տարածաշրջանային կոմունիկացիաների բացման, ռազմագերիների, պատանդների, այլ պահվող անձանց վերադարձման ուղղությամբ»,- ասվում է հայտարարության մեջ։
Էմմա Չոբանյան
