27.02.2026 | 23:31
Ստեփանծմինդա-Լարս ավտոճանապարհը փակ է
Պեսկովը խոսել է ՌԴ-ում թուրքական «Բայրաքթար» անօդաչուների արտադրություն հիմնելու Պուտինի՝ Էրդողանին արված առաջարկից
Քաղաքականություն
27.07.2022 | 20:40
ՌԴ-ի ու Թուրքիայի միջև ռազմատեխնիկական համագործակցությունը մշտապես գտնվում է օրակարգում։ Այս մասին հայտարարել է ՌԴ նախագահի մամուլի խոսնակ Դմիտրի Պեսկովը՝ պատասխանելով հարցին, թե արդյոք նախագահ Վլադիմիր Պուտինը Թուրքիայի նախագահ Ռեջեփ Թայիփ Էրդողանի հետ քննարկել է «Բայրաքթար» անօդաչուներ արտադրող ընկերության հետ համագործակցության հարցը, գրում է Ռիա Նովոստին։
«Երկու երկրների միջև ռազմատեխնիկական համագործակցությունը մշտապես օրակարգում է: Եվ հենց այն փաստը, որ մեր փոխգործակցությունը զարգանում է նման զգայուն ոլորտում, վկայում է այն մասին, որ ընդհանուր առմամբ, մեր հարաբերությունների ողջ համալիրը գտնվում է շատ բարձր մակարդակի վրա»,-ասել Պեսկովը։
Նա հաստատել է, որ վերջին շփումների ընթացքում երկու երկրների նախագահների տարբեր հարթություններում շոշափվել է ռազմատեխնիկական համագործակցության թեման, և, որպես կանոն, տարբեր ասպեկտներ քննարկվում են գրեթե յուրաքանչյուր հանդիպման ժամանակ։
«Այդ պատճառով, այո՛, ռազմատեխնիկական համագործակցության թեման Սոչիում, հավանաբար, քննարկվելու է,-ասել է Պեսկովը։
Հավելենք, որ օգոստոսի 5-ին մեկօրյա այցով Էրդողանը մեկնելու է Սոչի։
Հիշեցնենք, որ նախօրեին թուրքական լրատվամիջոցները տեղեկություններ էին տարածել, որ Էրդողանը երկուշաբթի օրը կայացած բարձրագույն կուսակցական հանդիպման ժամանակ իր գործընկերներին ասել է, որ Պուտինը դիմել է իրեն Թեհրանում վերջերս կայացած հանդիպման ժամանակ՝ առաջարկելով գործարք կնքել թուրքական «Բայքար» ընկերության հետ հարվածային անօդաչու թռչող սարքեր արտադրելու համար։
Էմմա Չոբանյան
