Քաղաքականություն
26.07.2022 | 22:13
Վաղը՝ հուլիսի 27-ին, Ստամբուլում բացվելու է Ուկրաինայից հացահատիկի անվտանգ փոխադրման համակարգող կենտրոնը։ Այս մասին հայտնում է Թուրքիայի ՊՆ-ն, գրում է ՏԱՍՍ-ը։ «Կենտրոնի բացման արարողությանը ելույթ կունենա Թուրքիայի ազգային պաշտպանության նախարար Հուլուսի Աքարը»,-ասվում է հայտարարության մեջ։
ՌԴ ՊՆ-ն ավելի վաղ հայտնել էր, որ Ստամբուլ ռուս փորձագետների խումբ է այցելելու, որոնք սկսելու են քառակողմ ձևաչափով աշխատանքը։ Կենտրոնը ստեղծվել է Թուրքիայի ազգային պաշտպանության համալսարանի բազայի վրա և գտնվում է Լևենթ շրջանում։ Տեղական ԶԼՄ-ների տվյալներով՝ այնտեղ 20 մարդ է աշխատելու՝ Թուրքիայի, ՌԴ-ի ու Ուկրաինայի ԶՈՒ-ի սպաները, ինչպես նաև՝ ՄԱԿ-ի ներկայացուցիչները։
Հիշեցնենք՝ Թուրքիայի, ՌԴ-ի, Ուկրաինայի ու ՄԱԿ-ի միջև ուկրաինական հացահատիկի արտահանման մասին համաձայնությունը ձեռք էր բերվել Ստամբուլում հուլիսի 22-ին։
Էմմա Չոբանյան
