22.04.2026 | 16:00
ՀՀ դպրոցականները մեդալներ են նվաճել ինֆորմատիկայի միջազգային օլիմպիադայում
ԱԱԾ-ի բացահայտած 43 ենթադրյալ դավաճաններից 30-ը ազատության մեջ է. ովքե՞ր են անցնում քրգործերով․ ՏԵՍԱՆՅՈՒԹ
Հասարակություն
20.07.2022 | 21:59
Ազգային անվտանգության ծառայությունը պետական դավաճանության կասկածանքով ընդհանուր առմամբ 43 անձի է կալանավորել։ Այս մասին Factor TV-ին հայտնում են Գլխավոր դատախազությունից՝ մանրամասնելով, որ ԱԱԾ-ի վարույթում պետական դավաճանության հոդվածով հարուցված 10 քրգործ կա։ Այս գործերն առնչվում են 2020 թվականի 44-օրյա պատերազմի ընթացքին և դրան հաջորդած ժամանակահատվածին։
Ստացվում է, որ ըստ իրավապահ կառույցի, 1,5 տարվա ընթացքում չորս տասնյակից ավելի քաղաքացի պետական դավաճանություն է գործել։ Ուշագրավ է, սակայն, որ նրանցից միայն 10-ն է կալանքի տակ։ Պատերազմի ընթացքում և դրան հաջորդած ժամանակահատվածում պետական դավաճանության դեպքերով հարուցված քրեական գործերից 3-ն ուղարկվել է դատարան։ 12 անձ ամբաստանյալի կարգավիճակ ունի, նրանցից կալանավորված է 11-ը։
«Վաղվա Արցախ» կուսակցության համահիմնադիր Տիգրան Պետրոսյանն այս թվերը մտահոգիչ է համարում Հայաստանի նման փոքր երկրի համար։
ԱԱԾ-ն հայտնում է, որ զինծառայողները թշնամական պետության հատուկ ծառայությունների աշխատակիցներին սոցալական ցանցերի միջոցով պետական գաղտնիք պարունակող տեղեկություններ են հայտնել։
Կառույցից դավաճանության հոդվածով հարուցված քրգործերի վերաբերյալ այլ մանրամասներ հրաժարվում են հայտնել։ Մինչդեռ Factor TV-ն տեղեկություններ է ստացել, որ պետական դավաճանության քրգործերով անցնող որոշ զինծառայողների խափանման միջոցը փոխվել է, և նրանք ազատության մեջ են հայտնվել։ ԱԱԾ-ից մեր գրավոր հարցերն անպատասխան են թողել՝ չհստակեցնելով, թե քանի զինծառայողի խափանման միջոց է փոխվել՝ տեղեկությունը որակելով հրապարակմանը ոչ ենթակա նախաքննական տվյալ։
Ուշագրավ է, որ ԱԱԾ-ն չի հերքել տեղեկությունը, որ որոշ մեղադրյալների խափանման միջոցը փոխվել է, ինչպես, օրինակ, հստակ հերքել է, որ որևէ անձի նկատմամբ քրեական հետապնդումը չի դադարեցվել։ ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանից հետաքրքրվեցինք՝ ինչու է ԱԱԾ-ն բերման ենթարկում, այդ տեսարանը ցուցադրում, որտեղ նաև մեղադրյալը ինքնախոստովանական ցուցմունք է տալիս, իսկ հետո առանձին դեպքերով փոխում խափանման միջոցը։ Հայաստանի ԱԱԾ-ին զուգահեռ պետական դավաճանության դեպքերի բացահայտման մասին հայտնում է նաև Արցախի ԱԱԾ-ն։ Իրավապահ կառույցը պատերազմից հետո շուրջ 10 դեպքի մասին է տեղեկացրել։ Խնդրին վերջերս Արցախի խորհրդարանում անդրադարձավ նաև ԱՀ նախագահ Արայիկ Հարությունյանը։
44-օրյա պատերազմից շուրջ երկու տարի անց անհայտ է մնում Նիկոլ Փաշինյանի կողմից բարձրաձայնված դավաճանական մեկ այլ դեպքի մանրամասները։ Այդպես էլ հայտնի չդարձավ, թե ովքեր են պատերազմի թեժ օրերին գնացել առաջնագիծ և, ինչպես վարչապետն էր նշում, հայտարարել․ «Նիկոլ Փաշինյանը հողերը ծախել է», և պատերազմելու անհրաժեշտություն չկա։
Մանրամասները` տեսանյութում։
Նարեկ Կիրակոսյան
