02.02.2026 | 12:51
ՊՆ վարչական համալիրում դիմավորել են պաշտոնական այցով ՀՀ ժամանած Հնդկաստանի ԶՈՒ պաշտպանության շտաբի պետին
Զավեշտ է Նարիշկինի ասածը, թե ՌԴ-ն կպաշտապանի ՀՀ-ին․ նա ԼՂ-ի դեմ ահաբեկչական սպառնալիքից խոսեց, բայց չպաշտպանեցին մեզ․ Ստյոպա Սաֆարյան. ՏԵՍԱՆՅՈՒԹ
Քաղաքականություն
19.07.2022 | 19:10
Միջազգային և անվտանգության հարցերի հայկական ինստիտուտի հիմնադիր Ստյոպա Սաֆարյանը Factor TV-ի հարցազրույցում «զավեշտալի» է որակում Հայաստան ժամանած ՌԴ արտաքին հետախուզության ծառայության ղեկավար Սերգեյ Նարիշկինի հայտարարությունը, թե «Ռուսաստանը բավականաչափ ուժ ու ռեսուրս ունի, որպեսզի դժվար պահին պաշտպանի դաշնակիցներին ու ընկերներին»։ Քաղաքագետը Նարիշկինի հավաստիացումը կասկածի տակ է դնում՝ հիշեցնելով 44-օրյա պատերազմի ժամանակ նույն Նարիշկինի վարքագիծը․ «Ինքը՝ Նարիշկինը պատերազմի առաջին շաբաթներին խոսում էր Մերձավոր Արևելքից՝ Սիրիայից, Արցախյան պատերազմի թատերաբեմ բերված վարձկան ահաբեկիչների մասին։ Եթե ՀՀ-ի ռազմավարական դաշնակիցը խոսում է ՀՀ-ին սպառնացող վտանգի մասին, ըստ որում՝ ահաբեկչական վտանգի մասին է խոսում՝ քանի որ Սիրիայից բերված գրոհայիններն ահաբեկչական խմբավորումներ էին, բայց դրան ՌԴ-ի կողմից չհաջորդեց որևէ գործողություն՝ կանխելու իր դաշնակցի նկատմամբ ոտնձգությունները, ներեցեք, բայց ստացվում է՝ Դոնբասում «ռուսական աշխարհին» ոչինչ չպիտի սպառնա, իսկ Արցախում կարող են «հայկական աշխարհին» տեռորիստնե՞րը սպառնալ։ Որտե՞ղ է ռուսական քաղաքականության տրամաբանությունը»,- հարց է բարձրացնում Ստյոպա Սաֆարյանը։
Factor TV-ի հարցազրույցում Միջազգային և անվտանգության հարցերի հայկական ինստիտուտի հիմնադիրը անդրադառնում է նաև Արցախից ՀՀ-ի զորքերի դուրսբերման հանգամանքին՝ շեշտելով, որ այն ՌԴ-ի՝ Ադրբեջանին տված խոստման կատարումն է։ Խոսելով ՀՀ-ի կողմից առանձին արտաքին հետախուզական ծառայություն ստեղծելու ԱԽ քարտուղարի հայտարարած գաղափարից՝ Ստյոպա Սաֆարյանը պնդում է, որ դա ՌԴ-ի հետ չի կարող ՀՀ-ն իրականացնել՝ նախ կարիք կա ռուսական ազդեցության գործակալներից ազատել ՀՀ-ի անվտանգային համակարգերը։ Քաղաքագետը նշում է, որ ԱՄՆ ԿՀՎ ղեկավարի, Իրանի Անվտանգության խորհրդի քարտուղարի, ՌԴ արտաքին հետախուզության ծառայության ղեկավարի համաժամանակյա այցերը Հայաստան ցույց են տալիս, որ ՀՀ-ի նկատմամբ հետաքրքրությունն աճում է։ Ըստ Սաֆարյանի՝ ԼՂ-ի կոնֆլիկտի հարցում ՀՀ-ն ընդհանուր շահեր ունի Արևմուտքի հետ, որը պնդում է կոնֆլիկտի գոյության փաստը։ Թուրքիան, Ադրբեջանն ու ՌԴ-ն փորձում են Արևմուտքին դուրս մղել ռեգիոնից, և միայն ՀՀ-ն է, որ ըստ քաղաքագետի, Արևմուտքին թույլ է տալիս վերականգնել միջազգային մանդատը։
Հարցազրույցն ամբողջությամբ՝ տեսանյութում։
Ռոբերտ Անանյան
