13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
«Դուք հուսալի գործընկեր եք ԵՄ-ի համար էներգետիկ անվտանգության ոլորտում»․ Ուրսուլա ֆոն դեր Լեյենը՝ Ալիևին
Քաղաքականություն
18.07.2022 | 21:16
Եվրահանձնաժողովի ղեկավար Ուրսուլա ֆոն դեր Լեյենը Բաքվում հայտարարել է, որ Ադրբեջանը հուսալի գործընկեր է ԵՄ-ի համար, փոխանցում են ադրբեջանական լրատվամիջոցները։
«Դուք հուսալի գործընկեր եք ոչ միայն մեր էներգետիկ անվտանգության, այլ նաև կանաչ էներգիայի ոլորտում։ Ստորագրված փաստաթուղթն էլ ավելի կամրապնդի մեր համագործակցությունը էներգետիկ ոլորտում»,-ասել է Լեյենը Ադրբեջանի նախագահ Իլհամ Ալիևին մամուլի համար արված հայտարարության ընթացքում։
Նա նաև ներկայացրել է փաստաթղթի երեք հիմնական կետերը։
«Սկզբում մենք կկրկնապատկենք Ադրբեջանից գազի արտահանումը, այս փաստաթղթով մենք մեր հանձնառությունն ենք հայտնում Հարավային գազային միջանցքի ընդլայնմանը։ Այս նախագիծն արդեն շատ կարևոր է ԵՄ-ի համար, մենք տարեկան 8 մլրդ խմ գազ ենք մատակարարում Եվրոպային, առաջիկա տարիներին ծավալները կհասցնենք 20 մլրդ խմ-ի։ Հաջորդ տարի մենք ծավալը կհասցնենք 12 մլրդ խորանարդ մետրի, և դա կլինի Ռուսաստանից անջատված գազի փոխհատուցմանը և զգալի ներդրում կունենա Եվրոպայի էներգամատակարարման գործում»,-ասել է Եվրահանձնաժողովի ղեկավարը։
Հավելենք, որ Իտալիայի, Հունաստանի և Բուլղարիայի սպառողներին TAP գազատարով ադրբեջանական գազի մատակարարումները սկսվել են 2020 թվականի դեկտեմբերի 31-ին։ 2021-ին Ադրբեջանը Եվրոպա է արտահանել 8,2 միլիարդ խորանարդ մետր գազ, 2022 թ․ առաջին եռամսյակում՝ 2,6 միլիարդ խորանարդ մետր։ Հիշեցնենք, որ այսօր Ադրբեջանն ու ԵՄ էներգետիկ անվտանգության համաձայնագիր են ստորագրել։
Էմմա Չոբանյան
