22.04.2026 | 16:00
ՀՀ դպրոցականները մեդալներ են նվաճել ինֆորմատիկայի միջազգային օլիմպիադայում
Իրանն արձագանքել է ԱՄՆ-ի ու Իսրայելի միջև կնքված ռազմավարական գործընկերության հռչակագրին
Քաղաքականություն
15.07.2022 | 15:02
Իրանի ԱԳՆ խոսնակն արձագանքել է նախօրեին ԱՄՆ նախագահ Ջո Բայդենի ու Իսրայելի վարչապետ Յաիր Լապիդի ստորագրած ռազմավարական գործընկերության հռչակագրին, գրում է իրանական Մեհր գործակալությունը։
«Բայդենի և Լապիդի համատեղ հռչակագիրը ընդգծում է Իսրայելի անվտանգության և ռազմական գերակայությունը պահպանելու Միացյալ Նահանգների հաստատուն և վճռական հանձնառությունը։ Մի՛ սխալվեք, թիրախը միայն Իրանը չէ, արաբական ու իսլամական երկրները միշտ պետք է ընդունեն սիոնիստական ռեժիմի գերակայությունը»,-թվիթերյան իր էջում գրել է Նասեր Քանանին։ Նա հավելել է, որ իրենց համար տարածաշրջանում սպառնալիքի հիմնական աղբյուրը պարզ է։
Երկու երկրների միջև ռազմավարական գործընկերության հռչակագիրը ստորագրվել էր նախօրեիին։ Համաձայն դրա՝ Վաշինգտոնը խոստանում է «օգտագործել իշխանությունների տրամադրության տակ գտնվող բոլոր ուժերն ու միջոցները»՝ Իրանի կողմից միջուկային զենքի մշակումը կանխելու համար։
«ԱՄՆ-ն վերահաստատում է իր հանձնառությունը գործընկերների հետ աշխատելու՝ հակազդելու Իրանի ագրեսիային և ապակայունացնող գործողություններին, անկախ այն բանից, դա իրականացվում է ուղղակիորեն, թե վստահված անձանց և ահաբեկչական կազմակերպությունների միջոցով»,-ասվում է Սպիտակ տան հայտարարության մեջ։ Համաձայնագրի շրջանակներում կողմերը նաև պատրաստվում են մշակել լազերային զենք, որն, ըստ նրանց, կբարձրացնի Իսրայելի անվտանգությունը։
Էմմա Չոբանյան
