21.06.2026 | 02:11
ԱԱ-2026. Գերմանիան կամային հաղթանակի հասավ վերջնամասում. ՏԵՍԱՆՅՈՒԹ
Վլադիմիր Պուտինը ստորագրել է «օտարերկրյա գործակալների մասին» նոր օրենք
Քաղաքականություն
14.07.2022 | 20:58
Ռուսաստանի նախագահ Վլադիմիր Պուտինը ստորագրել է «օտարերկրյա գործակալների մասին» նոր օրենք, ըստ որի՝ այս կարգավիճակը կարող է տրվել օտարերկրյա ֆինանսավորում չունեցողների։ Օրենքը հրապարակվել է իրավաբանական տեղեկատվության պաշտոնական ինտերնետային պորտալում։ Այն ուժի մեջ կմտնի դեկտեմբերի 1-ից, գրում է DW-ի ռուսական ծառայությունը։
«Օտարերկրյա ազդեցության տակ գտնվող անձանց գործունեության նկատմամբ վերահսկողության մասին» օրենքի համաձայն՝ ցանկացած ռուս կամ օտարերկրյա կազմակերպություն կամ անհատ կարող է ճանաչվել որպես «օտարերկրյա գործակալ», եթե նրանք ստանում են օտարերկրյա աջակցություն կամ «այլ ձևերով գտնվում են օտարերկրյա ազդեցության տակ», ինչպես նաև իրականացնում են քաղաքական գործունեություն, կամ Ռուսաստանի ռազմատեխնիկական գործունեության մասին տեղեկություններ են հավաքում, որը «կարող է օգտագործվել երկրի անվտանգության դեմ»։
Գործատուների ասոցիացիաները, առևտրաարդյունաբերական պալատները և միջազգային կազմակերպությունների պաշտոնյաները չեն կարող ճանաչվել որպես «օտարերկրյա գործակալներ», ասվում է փաստաթղթում։
Միևնույն ժամանակ, փաստաթուղթն արգելում է «օտարերկրյա գործակալներին» կրթական և մանկավարժական գործունեություն ծավալել անչափահասների հետ և նրանց համար տեղեկատվական արտադրանք արտադրել, մասնակցել պետական և մունիցիպալ կարիքների համար ապրանքների և ծառայությունների գնմանը, ստանալ պետական ֆինանսական աջակցություն, օգտագործել կարևոր ենթակառուցվածքներ, օբյեկտներ և որպես փորձագետ մասնակցել բնապահպանական պետական փորձաքննություններին:
«Օտարերկրյա գործակալներին» կարգելվի աշխատել պետական կառույցներում, նրանք չեն կարող լինել ընտրական հանձնաժողովների անդամներ և հանրային միջոցառումների կազմակերպիչներ։
Տաթև Ֆռանգյան
