20.11.2024 | 18:19
Ռուսական ինքնաթիռից 250 կգ-անոց ռումբն ընկել է ՌԴ Բելգորոդի շրջանի դպրոցի վրա
ՍիվիլՆեթն ու Թրանսփարենսի ինթերնեշնլը դատարանում հաղթել են Բնապահպանության և ընդերքի տեսչական մարմնին
12.07.2022 | 13:07
ՍիվիլՆեթը և «Թրանսփարենսի ինթերնեշնլ» հակակոռուպցիոն կենտրոնը վարչական դատարանում հաղթել են Բնապահպանության և ընդերքի տեսչական մարմնին։ Վարչական դատարանի դատավոր Հրաչ Այվազյանը հուլիսի 7-ին վճռել է մասնակի բավարարել երկու կազմակերպությունների հայցն ընդդեմ տեսչական մարմնի ու պարտավորեցնել վերջինիս տրամադրել հայցված տեղեկատվությունը։
Անցյալ տարի ՍիվիլՆեթը «Թրանսփարենսի ինթենեշնլ»-ի հետ դիմել էր Բնապահպանության և ընդերքի տեսչական մարմնին՝ պահանջելով տրամադրել 2018-ից մինչ 2021-ը մետաղական հանքերում տեսչական մարմնի իրականացրած ստուգումների արդյունքում կազմված ակտերը։ Տեսչական մարմինը երկու անգամ հրաժարվել էր լրատվամիջոցին տրամադրել այդ տվյալները։ Այդ ակտերում են ամփոփված ստուգումների ժամանակ հայտնաբերված խախտումները, դրանց բնույթը, համապատասխանությունը ընդերքի օգտագործման պայմանագրերին և այլն։ Բնապահպանության և ընդերքի տեսչական մարմինը, որ նախկինում հրապարակում կամ տրամադրում էր լրատվամիջոցներին ստուգման ակտերը, հրաժարվում էր դա կատարել՝ խորհուրդ տալով ստուգումների մասին տեղեկություններին ծանոթանալ իրենց հրապարակած հաշվետվություններում։ Այդ հաշվետվությունները, սակայն, սահմանափակ տեղեկություններ են պարունակում ընդերքօգտագործողների նկատմամբ կիրառված պատասխանատվության միջոցների, թերությունները վերացնելու համար դրանց տրված հանձնարարականների, վարչական իրավախախտման քննությամբ կայացված որոշումների մասին։ Տեղեկատվության մերժման՝ օրենքով սահմանված հիմքեր տեսչական մարմնի կողմից չէին նշվել։
Անցյալ տարվա օգոստոսի 30-ին դատարանը վարույթ էր ընդունել ՍիվիլՆեթի և «Թրանսփարենսի ինթերնեշնլ»-ի հայցը։ Տեսչական մարմինը հայցի վերաբերյալ որևէ դիրքորոշում և առարկություն չի ներկայացրել դատարան։ Դատարանն արձանագրել է, որ տեսչական մարմնի հաշվետվություններում հայցված տեղեկությունները բացակայում են։ Բավարարելով հայցը՝ դատարանը, միևնույն ժամանակ, նշել է, որ տեսչական մարմինը կարող է չտրամադրել այնպիսի տվյալներ, որոնք վերաբերում են հանքարդյունաբերողների գործառնություններին, գյուտերին և այլն։
ՍիվիլՆեթի և «Թրանսփարենսի ինթերնեշնլ»-ի շահերը վարչական դատարանում ներկայացնում էր «Իրավունքի զարգացման և պաշտպանության հիմնադրամ»-ը՝ հանձին Գենյա Պետրոսյանի և Էլինա Գյուրջյանի։
