15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Լուկաշենկոն շնորհավորել է Բայդենին, Պուտինը՝ ոչ
Քաղաքականություն
04.07.2022 | 19:12
Ռուսաստանի նախագահ Վլադիմիր Պուտինը չի շնորհավորի ԱՄՆ նախագահ Ջո Բայդենին՝ Միացյալ Նահանգների Անկախության օրվա առիթով։ Այս մասին այսօր հայտարարել է Կրեմլի խոսնակ Դմիտրի Պեսկովը։
«Ո՛չ, այս տարի շնորհավորական հեռագիր չի ուղարկվի»,- լրագրողներին ասել է Պեսկովը։
Նրա պնդմամբ՝ այս տարին դարձել է Ռուսաստանի նկատմամբ ԱՄՆ-ի ոչ բարեկամական քաղաքականության գագաթնակետը, այս պայմաններում դժվար թե նպատակահարմար համարվի շնորհավորական ուղերձ հղելը։
Սակայն ամերիկացի ժողովրդին շնորհավորել է Միութենական պետության՝ Բելառուսի առաջնորդ Ալեքսանդր Լուկաշենկոն։ ՌԴ ամենասերտ դաշնակցի ուղերձում, որի տեքստը զետեղված է Բելառուսի ղեկավարի պաշտոնական կայքում, Լուկաշենկոն կոչ է արել ամերիկացիներին մոռանալ տարաձայնությունների մասին և միավորել ուժերը՝ «այսօրվա խիստ տագնապալի և անապահով իրավիճակից ելք գտնելու համար»։
Ավելի վաղ՝ կիրակի օրը, ԱՄՆ պետքարտուղար Էնթոնի Բլինքենն էր շնորհավորել Բելառուսին Անկախության օրվա առթիվ և աջակցություն հայտնել այդ երկրի քաղաքացիներին ազատության և ժողովրդավարության համար իրենց պայքարում։
«Թեև Անկախության օրն առիթ է՝ տոնելու այդքան դժվարությամբ նվաճված ազատությունները, բելառուսները դեռևս չունեն իրենց երկրի ապագան որոշելու և իրենց տեսակետներն արտահայտելու կարողություն՝ առանց դաժան հաշվեհարդարից վախենալու»,- ասված է պետքարտուղարի հայտարարության մեջ:
Կրեմլի պաշտոնական կայքում հրապարակված տեղեկությունների համաձայն՝ Պուտինը վերջին անգամ ԱՄՆ առաջնորդին Անկախության օրվա առթիվ շնորհավորել է 2016 թվականին։ Այդ ժամանակ ԱՄՆ նախագահն էր Բարաք Օբաման։
Անցյալ տարի Պուտինը Բայդենին շնորհավորել է Սուրբ ծննդյան և Ամանորի կապակցությամբ, անգամ «միմյանց ազգային շահերը հաշվի առնող ու փոխադարձ հարգանքի հիման վրա արդյունավետ ռուս-ամերիկյան երկխոսության հույս հայտնել»։
Տաթև Ֆռանգյան
