17.10.2026 | 14:04
Հրապարակվել են հոկտեմբերի 25-ին կայանալիք ՏԻՄ ընտրությունների ընտրողների վերջնական ցուցակները
Մոսկվայի և Ռուսաստանի ևս 8 քաղաքի օդանավակայանները կրկին փակվել են ԱԹՍ-ների հարձակումների պատճառով
Քաղաքականություն
17.10.2026 | 13:50
Ուկրաինական անօդաչու թռչող սարքերի հնարավոր հարձակումների սպառնալիքի պատճառով երկրորդ գիշերն անընդմեջ ժամանակավորապես դադարեցրել են աշխատանքը Մոսկվայի բոլոր չորս օդանավակայանները։ Այս մասին շաբաթ՝ հոկտեմբերի 17-ի գիշերը, հայտնել են Ռուսաստանի օդային տրանսպորտի դաշնային գործակալությունից՝ «Ռոսավիացիայից»։
«Մեդուզա»-ն, հենվելով առցանց չվացուցակների տվյալների վրա, հաշվել է, որ ավելի քան 350 չվերթ հետաձգվել կամ չեղարկվել է։ Ամենաշատ խափանումները գրանցվել են «Շերեմետևո» օդանավակայանում։
Ռուսաստանի մայրաքաղաք մեկնող որոշ չվերթներ ուղղվել են այլ քաղաքներ։ Նիժնի Նովգորոդի «Չկալով» միջազգային օդանավակայանի մամուլի ծառայության հաղորդմամբ՝ այն ընդունել է Մոսկվայի օդանավակայաններ ուղևորվող 22 ինքնաթիռ։ Որոշ ինքնաթիռներ վայրէջք են կատարել նաև Սանկտ Պետերբուրգում և Կազանում։
Ուղղությունը փոխած ինքնաթիռների ուղևորները դժգոհել են, որ ժամերով չեն կարողացել դուրս գալ ինքնաթիռներից կամ ստիպված են եղել երկար սպասել ավտոբուսներին։ Այս մասին գրում է «Օստորոժնո, նովոստի» Telegram-ալիքը։
Մոսկվայի քաղաքապետ Սերգեյ Սոբյանինի հաղորդմամբ՝ գիշերվա ընթացքում Ռուսաստանի մայրաքաղաքի ուղղությամբ շարժվել է ավելի քան 140 անօդաչու թռչող սարք։
Մոսկվայի օդանավակայաններից բացի՝ աշխատանքի խափանումներ են եղել Ռուսաստանի ևս ութ քաղաքների օդանավակայաններում՝ Կալուգայում, Սոչիում, Յարոսլավլում, Կոստրոմայում, Չերեպովեցում, Սարատովում, Պենզայում և Գելենջիկում։
Օդանավակայանների աշխատանքի մոնիթորինգի ծառայության տվյալներով՝ Ռուսաստանի բոլոր օդանավակայաններում սահմանափակումների ընդհանուր տևողությունը կազմել է 75 ժամ։
Միևնույն ժամանակ, Մոսկվայի ժամանակով ժամը 12:00-ի դրությամբ, Սոչիի և Գելենջիկի օդանավակայաններում սահմանափակումները դեռ չէին վերացվել։
