26.11.2024 | 15:19
Պապիկյանը հետևել է ԶՈՒ բարձրագույն և ավագ սպայական կազմերի հերթական ենթախմբի ատեստավորման գործընթացին
ԵՄ-ն կարող է 500 մլրդ եվրո տրամադրել Ուկրաինայի վերականգնման ծրագրի իրականացման համար․ Bloomberg
Քաղաքականություն
04.07.2022 | 15:40
ԵՄ-ի ներդրումը Ուկրաինայի վերականգնման ծրագրի իրականացմանը կարող է կազմել 500 մլրդ եվրո (523 մլրդ դոլար)։ Այս մասին հայտնել է Bloomberg-ը՝ վկայակոչելով Ուկրաինայի դոնորների օգնության ծրագրին և քննարկումներին ծանոթ պաշտոնյաներին, փոխանցում է Forbes-ի ռուսական ծառայությունը։
Նշվում է, որ ծրագրում ներառվելու են նախագծեր ենթակառուցվածքների, անվտանգության, կլիմայի և թվային տնտեսության ոլորտում ներդրումների և էներգետիկայի դիվերսիֆիկացման ոլորտներում։
Գործակալության զրուցակիցների խոսքով՝ Ուկրաինան հուլիսի 4-ին և 5-ին Լուգանոյում կայանալիք համաժողովում կներկայացնի երկրի վերականգնման պլանը՝ 2000 էջով։ Ուկրաինայի կառավարությունը նախագիծը քննարկել է դոնոր երկրների, ինչպես նաև ԵՄ-ի հետ։ Եվրոպական հանձնաժողովը ներկայում ուսումնասիրում է դրամաշնորհների և վարկերի տեսքով ֆինանսավորման տարբերակները: Ֆինանսավորման տարբերակներից մեկը կարող է լինել համատեղ փոխառությունը։
Լրատվամիջոցի աղբյուրների տվյալներով՝ ԵՄ-ում քննարկումների համար հիմք պետք է հանդիսանա հայեցակարգային փաստաթուղթը, որը մշակվում է Եվրահանձնաժողովի կողմից՝ Ուրսուլա ֆոն դեր Լյայենի գլխավորությամբ։ Աշնան սկզբին Եվրոպական հանձնաժողովի և Գերմանիայի կողմից՝ որպես G7 խմբի նախագահ, կհրավիրվի օգնության ծրագրի խթանմանն ուղղված համաժողով: Չեխիան, որը կես տարի նախագահում է ԵՄ-ում, ծրագրում է նոյեմբերին կազմակերպել դոնորների համաժողով։
Եվրահանձնաժողովի նախագահ Ուրսուլա ֆոն դեր Լյայենը մասնակցելու է Լուգանոյում կայանալիք համաժողովին։ Նա ներկայացնելու է ԵՄ հիմքի վրա համաշխարհային դոնորների հարթակը։ Ըստ լրատվամիջոցի աղբյուրների՝ դոնորների թվում են լինելու Մեծ յոթնյակի անդամները, միջազգային կազմակերպությունները, Շվեյցարիան, Նորվեգիան։
Էմմա Չոբանյան
