31.05.2026 | 19:16
Մեզ սարքում են ՌԴ-ի թշնամի, տանում Ուկրաինայի ճանապարհով․ Քոչարյան․ ՏԵՍԱՆՅՈւԹ
ՌԴ-ում կալանավորել են «իշխանության բռնի զավթում» նախապատրաստող խմբի անդամների․ ԱԴԾ
Քաղաքականություն
29.06.2022 | 16:31
ՌԴ Անվտանգության դաշնային ծառայության Վոլգոգրադի վարչության աշխատակիցները ձերբակալել են շրջանի բնակիչների, որոնք, իբր, քննարկել են «իշխանությունը բռնությամբ զավթելու» նախապատրաստության հարցեր։
Այս մասին լրագրողներին հայտնել են գերատեսչության մամուլի ծառայությունում, փոխանցում է VOA-ն։
Գերատեսչության տվյալներով՝ օպերատիվ-որոնողական աշխատանքների ընթացքում պարզվել է, որ մեղադրյալները Վոլգոգրադում «ծայրահեղական կազմակերպություն» են ստեղծել։
Ըստ ԱԴԾ-ի՝ հանդիպումների ժամանակ նրանք, իբր, քննարկել են Ռուսաստանի անվտանգության ուժերի և զինվորականների դեմ դյուրավառ խառնուրդների և հրազենի կիրառմամբ կառավարությունը տապալելու ծրագրեր։
«Ռուսաստանի Անվտանգության դաշնային ծառայության Վոլգոգրադի շրջանի վարչության աշխատակիցները, ՌԴ ՆԳՆ տարածաշրջանի գլխավոր տնօրինության ներկայացուցիչների հետ միասին, հայտնաբերել են տարածաշրջանի բնակիչների, որոնք ներգրավված են տարածաշրջանում ծայրահեղական համայնքի ստեղծման մեջ: Օպերատիվ-որոնողական աշխատանքների ընթացքում պարզվել է, որ այս կազմակերպության անդամներն իրենց հանդիպումների ժամանակ քննարկել են իրավապահ մարմինների և ՌԴ զինված ուժերի ներկայացուցիչների նկատմամբ հրազենի և դյուրավառ խառնուրդների կիրառմամբ իշխանության բռնի զավթման վերաբերյալ հարցեր և նախապատրաստական աշխատանքներ»,- ասված է հաղորդագրությունում։
Այլ մանրամասներ չեն հաղորդվում։
Ռուսական լրատվամիջոցների փոխանցմամբ՝ ձերբակալվածների նկատմամբ գործեր են հարուցվել «ծայրահեղական համայնք կազմակերպելու» հոդվածով։ Նրանց կարող է սպառնալ մինչև տասը տարվա ազատազրկում։
Տաթև Ֆռանգյան
