16.09.2026 | 22:12
Երևանի և 10 մարզի մի շարք հասցեներում էլեկտրաէներգիայի անջատումներ կլինեն
Կրեմենչուկում հրթիռակոծվել է առևտրի կենտրոնը․ G7-ի երկրների ղեկավարները դատապարտել են հարձակումը
Քաղաքականություն
28.06.2022 | 12:51
Ուկրաինական Կրեմենչուկի առևտրի կենտրոնի վրա ՌԴ-ի հրթիռային հարձակման հետևանքով զոհվել է 13 մարդ, հայտնել է Պոլտավայի տարածաշրջանային ռազմական վարչակազմի ղեկավար Դմիտրի Լունինը, փոխանցում է BBC-ի ռուսական ծառայությունը։
Հաղորդվում է նաև, որ ստացված վնասվածքներից հիվանդանոցում մահացել է մեկ մարդ։ Բուժօգնության է դիմել 59 մարդ, նրանցից գրեթե կեսը ծանր վիճակում է։
Ուկրաինայի Գլխավոր դատախազության տվյալներով՝ քաղաքացիներից ավելի քան 40 դիմում են ստացել իրենց հարազատների անհետ կորելու վերաբերյալ։
Ավերված առևտրի կենտրոնի տեղում փրկարարական աշխատանքները շարունակվում են։
Պոլտավայի շրջանային դատախազությունը նախաքննություն է սկսել պատերազմի օրենքների և սովորույթների խախտման հիմքով՝ զուգորդված դիտավորյալ սպանությամբ։ Միջադեպի առնչությամբ հետաքննություն է անցկացնում նաև Ուկրաինայի Անվտանգության ծառայությունը։
G7-ի երկրների ղեկավարները դատապարտել են Կրեմենչուկի առևտրի կենտրոնի վրա ռուսական հրթիռային հարձակումը։
«Անմեղ քաղաքացիների վրա անկանոն հարձակումները ռազմական հանցագործություն են: Ռուսաստանի նախագահ Վլադիմիր Պուտինը և մյուս մեղավորները պատասխանատվության կենթարկվեն»,- ասվում է G7-ի հայտարարության մեջ:
«Մեծ յոթնյակի» ղեկավարները վերահաստատել են «Ուկրաինային իրենց անսասան աջակցությունը»։
«Մենք չենք հանգստանա այնքան ժամանակ, քանի դեռ Ռուսաստանը չի ավարտել իր դաժան և անիմաստ պատերազմն Ուկրաինայի հետ»,- ընդգծել են նրանք։
Տաթև Ֆռանգյան
