17.12.2025 | 13:25
FIFA The Best. Մեսիի ընտրությունը, Ռոնալդուն դարձյալ չի քվեարկել
Արցախի հարցում Նիկոլ Փաշինյանն ավելի անզիջում է թվում, քան Սերժ Սարգսյանն ու Լևոն Տեր-Պետրոսյանը․ Թոմաս դե Վաալ
Քաղաքականություն
10.05.2018 | 16:05
Հայաստանում հայտնի բրիտանացի վերլուծաբան Թոմաս դե Վաալը «Հայկական հեղափոխությունն ու 88-ի ժառանգությունը» վերնագրված հոդվածով անդրադարձել է Հայաստանում ծավալված թավշյա հեղափոխությանը։
Օրերս «Քարնեգի» հիմնադրամի կայքում հրապարակած անդրադարձում դե Վաալը համեմատական է անցկացրել այժմյան իրադարձությունների և 88-ի շարժման միջև՝ ընդգծելով հիմնական տարբերությունները․ «30 տարի առաջ Հայաստանում ոչ պակաս դրամատիկ իրադարձություններ էին ծավալվում: 1988-ի փետրվարին լայն հանրությանը անհայտ քաղաքական գործիչները համարձակվեցին մարտահրավեր նետել տեղի կոմունիստական ղեկավարությանը՝ չնայած այն հանգամանքին, որ Հայաստանը համարվում էր Խորհրդային Միության ամենահանգիստ և հավատարիմ հանրապետությունների մեկը: Այսօր ընթացող բողոքի գործողություններին մասնակից երիտասադները, ի տարբերություն իրենց ծնողների, գրեթե ամբողջությամբ ձերբազատվել են խորհրդային մտածելակերպից և Մոսկվան որպես աշխարհի կենտրոն չեն ընկալում»:
Թոմաս դը Վաալի խոսքով՝ այսօրվա հայաստանցի երիտասարդները շատ ավելի պարփակված են ներհայկական օրակարգի շրջանակներում։ «Ղարաբաղյան հակամարտության ժառանգությունը` փակ սահմանները, ծայրահեղ ազգայնականությունը, ռազմականացումը, այս ամենը սահմանափակում է երիտասարդներին, սակայն նրանք դա ամբոջությամբ չեն էլ ըմբռնում: Փաշինյանը, որը անհնազանդության օրերին կրում էր զինվորական երանգավորում ունեցող վերնաշապիկ, դրա վառ օրինակն է։ Մայիսի 2-ին նա իր կողմնակիցներին ասաց. «Հարատև է լինելու Լեռնային Ղարաբաղի Հանրապետությունը, որը պետք է դառնա Հայաստանի Հանրապետության անբաժանելի մասը»: Այս տողերը արտասանելիս նա ավելի անզիջում է թվում, քան պատերազմի վետերան Սերժ Սարգսյանը, Լևոն Տեր-Պետրոսյանը, որոնք փորձում էին փոխզիջման բանակցություններ վարել ինչպես Ադրբեջանի, այնպես էլ Թուրքիայի հետ `Հայաստանի պետական զարգացման համար»,- նկատել է վերլուծաբանը:
