16.12.2025 | 11:35
Արցախից տեղահանված քանի անձ է ՀՀ քաղաքացիություն ստացել․ փոխնախարարը թվեր ներկայացրեց
ՔՊ֊ական պատգամավորն Ապարանի միջադեպին եղբոր ներկայությունը չհերքեց. ՏԵՍԱՆՅՈՒԹ
Քաղաքականություն
27.06.2022 | 12:04
Ապարանում տեղի ունեցած միջադեպը ոչ մեկի համար ընդունելի չէ: Այս մասին այսօր լրագրողների հետ զրույցում նշեց «Քաղաքացիական պայմանագիր» խմբակցության պատգամավոր Մաթևոս Ասատրյանը` անդրադառնալով Ապարանում 3 անձանց կյանք խլած կրակոցների միջադեպին:
«Խորապես շահագրգռված եմ և ինչով կարող եմ օգնելու եմ, որ ճշմարտութունը բացահայտվի: Ինձ համար շատ ցավալի է կորուստը»,- նշեց պատգամավորը:
Ասատրյանն իր ընտանիքի շուրջ բարձրացած աղմուկի համար մեադրեց լրատվամիջոցնրին՝ նշելով, որ իր հարազատներին ներքաշել են այդ պատմության մեջ և «այն սարքել քաղաքական հարց»։
Անդրադառնալով հարցին, թե արդյոք որևէ ՔՊ-ական կամ ՔՊ-ականի հարազատ այդ միջադեպին չի մասնակցել, Ասատրյանը պատասպանեց. «Միջադեպին ՔՊ-ական չի եղել ներգրավված, այնտեղ 100-ից ավելի մարդիկ են եղել, որոնցից թե ով ինչ առնչություն է ունեցել, թող քննությունը պարզի»:
Դիտարկմանը, որ արդեն քանի օր է շրջանառվում է տեղեկատվությունն այդ միջադեպին իր եղբոր ներգրավվածության մասին, բայց թեկուզ այդ տեղեկատվության ճշմարիտ կամ ոչ ճշմարիտ լինելը ստուգելու համար նրա եղբայրը չի կանչվել նախաքննական մարմին հարցաքննության, Ասատրյանը պատասխանեց. «Վստահ եմ, որ անպայման կանչելու են: Բազմաթիվ մարդիկ հարցաքննվելու են: Ես շահագրգիռ եմ, որ դեպքը բացահայտվի: Ինձ ասել են, որ շարունակական պրոցեսն առաջ է գնում, շատ ծավալուն գործընթաց է, մինչև այժմ մարդկանց կանչում են հարցաքննության»:
«Ես շարունակում եմ պնդել, որ ո՛չ ես, ո՛չ իմ հարազատներից որևէ մեկը կապ չունեն տվյալ դեպքի թե՛ նախարդող, թե՛ հաջորդող հարցերի հետ,- ընդգծեց պատգամավորը:- Այո՛, իմ եղբայրը եղել է այնտեղ, դա գազալցակայան է, մեզնից յուրաքանչյուրը կարող էր լինել այնտեղ… Բայց այնտեղ ծեծկռտուք չի եղել, առավել ևս իմ եղբոր մասնակցությամբ: Ես այդ մասին լսել եմ այնտեղ ներկա եղածներից և հավատում եմ նրանց»:
Անդրադառնալով հարցին, թե արդյոք իր եղբայրը նաև եղել է այն վայրում, որտեղ կրակոցներ են հնչել, պատգամավորը չհերքեց, բայց նշեց, որ չի ուզում մանրամասների մեջ մտնել. «Զերծ եմ մնում այդ հարցին պատասխանելուց»:
Հարցին՝ վարչապետ Նիկոլ Փաշինյանի հետ այս դեպքի առնչությամբ զրուցե՞լ են, Աստարյանը պատասխանեց. «Ո՛չ»:
Մանրամասները՝ տեսանյութում:
