Այսօր արվեստագետների խոսքն արժեզրկվել է քաղաքական այս կամ այն կլանին աջակցելու պատճառով. Վահագ Ռաշ. ՏԵՍԱՆՅՈՒԹ

«Մենք պատրաստ չենք հաջորդ պատերազմին, ոչ էլ պատրաստվում ենք: Ով ասում է` մեզ ընտրեք, հետ կբերենք կորցրած հողերը, դատարկաբանում է: Կորցրած հողերը հետ բերելու համար Ադրբեջանից երեսուն տարի պահանջվեց…Մեզ մնում է ճիշտ արտաքին քաղաքականություն վարել»,- Factor TV-ի հետ զրույցում նման տեսակետ է հայտնում երգիչ, երգահան Վահագ Ռաշը:

Նրա խոսքով` փողոցային պայքարի ելած ընդդիմությունը չկարողացավ իրեն համոզել, որ իրենց պայքարը երկրում լուրջ փոփոխությունների կարող է հանգեցնել. «Ասպարեզում նախկիններն են, ներկաները, իսկ մեջտեղում` ինչ-որ անհասկանալի ուժեր: Այնպիսի ժամանակներում ենք ապրում, որ ճիշտն ու սխալը շատ դժվար է տարբերել: Ամեն դեպքում, եթե երկու տարի առաջ ժողովրդի դեմքին գոնե ժպիտ կար, պատերազմից հետո մարդիկ շատ չարացան, զայրույթ կուտակվեց»,- ասում է երգիչը:

Նրա խոսքով` հեռուստատեսությունն էլ վերջին երեսուն տարում կերտեց այն մարդուն, որը գնաց և պարտվեց պատերազմում. «Սերիալների, հաղորդումների միջոցով արվեստագետին, գիտնականին «փչացրեցին», գիտնականը ներկայացվեց որպես խեղճ մարդ, «գողականը»` հզոր: Կար ժամանակ, որ Երևանում կիթառով քայլելն ամոթ էր, հիմա կարծես իրավիճակ է փոխվել»:

Վահագ Ռաշը խոսում է նաև հասարակական կարծիքի ձևավորման հարցում արվեստագետի դերի, նրա խոսքի կշռի մասին. «Ցավոք, այսօր արվեստագետների խոսքն արժեզրկվել է այս կամ այն կլանին աջակցելու պատճառով: Շատերը ժամանակին հովանավորվել են իշխանության կողմից, հիմա էլ, պարզ է, նախկին իշխանությանն են պաշտպանում: Պարել են այս կամ այն իշխանության դուդուկի տակ, դրա համար էլ հիմա արժանանում են ժողովրդի համարժեք վերաբերմունքին: Մինչդեռ արվեստագետը պետք է որևէ ուժից կախված չլինի, ազդեցության տակ չընկնի»:

Մանրամասները`տեսանյութում:

Աննա Բաբաջանյան