14.09.2026 | 09:45
Արտարժույթների փոխարժեքները՝ սեպտեմբերի 14-ի դրությամբ
Չավուշօղլուն հայտարարել է, որ Թուրքիան դեմ է ՌԴ-ի կողմից Ուկրաինայի հացահատիկի անօրինական վաճառքին
Քաղաքականություն
23.06.2022 | 14:28
Թուրքիան իրագործելի է համարում ու աջակցում է Ուկրաինայի նավահանգիստներից հացահատիկի դուրսբերման ծրագրին։ Այս մասին հայտարարել է Թուրքիայի ԱԳ նախարար Մևլութ Չավուշօղլուն Մեծ Բրիտանիայի ԱԳ նախարար Լիզ Թրասի հետ Անկարայում կայացած մամուլի ասուլիսում, գրում է «Անադոլու» գործակալությունը։
Նրա խոսքով՝ Անկարան ջանքեր է գործադրում պարենային ճգնաժամի արագ կարգավորման համար։ Չավուշօղլուն ասել է, որ Թուրքիան շարունակում է ակտիվ բանակցություններն այդ հարցով՝ ինչպես ՌԴ-ի, այնպես էլ Ուկրաինայի հետ։
«Եթե Ստամբուլում համաձայնություն ձեռք բերվի, ապա կստեղծվի մոնիթորինգի կենտրոն, ինչպես նաև «անվտանգության գոտի»՝ անմիջապես Ուկրաինայի ջրերից դուրս»,- ասել է թուրք նախարարը։
Միաժամանակ, Չավուշօղլուն ընդգծել է, որ Թուրքիան դեմ է ցանկացած երկրի, այդ թվում՝ Ռուսաստանի կողմից ուկրաինական հացահատիկի կամ այլ ապրանքների անօրինական վաճառքին։ Նա վստահեցրել է, որ Թուրքիան նման ապրանքներ չի ընդունի։
Լիզ Թրասն իր հերթին նշել է, որ եթե հացահատիկը դուրս չբերվի Ուկրաինայի նավահանգիստներից, լուրջ սով է սպասվում աշխարհին։
Հիշեցնենք՝ ավելի վաղ Անկարայում Ուկրաինայի դեսպան Վասիլի Բոնդարը Թուրքիային մեղադրել էր ՌԴ-ից ուկրաինական հացահատիկ գնելու մեջ։
Էմմա Չոբանյան
