16.12.2025 | 20:45
Անհիմն են արգելվել ցույցերը․ 2020-ին հայտարարված ռազմական դրության հետքերով. ՏԵՍԱՆՅՈՒԹ
Ցնցումների մեջ գտնվող 17-ամյա տղային բժիշկները հրաժարվե՞լ են օգնել․ ընտանիքը հաղորդում է ներկայացրել. ՏԵՍԱՆՅՈւԹ
Հասարակություն
17.06.2022 | 19:40
17-ամյա տղան երկու օր, օրվա ընթացքում մի քանի ժամ անընդմեջ ցնցումների ու զառանցանքի մեջ է անցկացրել։ Միջադեպի մասին արցունքն աչքերին պատմում է մայրը՝ Գայանե Սիմոնյանը։ Դեպքի մասին իմանալուց հետո շտապել է վերադառնալ Ռուսաստանից, որտեղ արտագնա աշխատանքի էր։
17-ամյա որդին երեք քույրերի հետ Հրազդանում է բնակվում, այդ օրերին նրանց տանն է եղել նաև մոր ընկերուհին՝ Մարինե Ազիզբեկյանը։
Տղայի՝ ցնցումների մեջ ընկնելուց հետո «Հրազդան» բժշկական կենտրոնի շտապօգնություն են զանգել, սական ժամանած բրիգադն օգնություն չի ցուցաբերել՝ պնդում են ընտանիքի անդամները։
Ժամանած շտապօգնության բժիշկները նաև խորհուրդ են տվել թմրամոլներով զբաղվող բրիգադ հրավիրել։ Տղան 3 օր շարունակ մնացել է տանը՝ առանց օգնության։
Հոգեբուժարանում խոստացել են պատանուն զննության ենթարկել, սակայն 1 օր անց, մինչ զննությունը, ըստ հարազատների՝ դեղ են տվել, իսկ քույրը թույլ չի տվել ու իր գրավոր համաձայնությամբ տղային տուն է տեղափոխել։
Ի դեպ, տղան դեպքի նախորդ օրը Ձյուդոյի հանրապետական մրցաշարում 3-րդ տեղն էր գրավել։ Արդեն 10 տարի է՝ սպորտով է զբաղվում։ Նախկինում երբեք նման դեպք նրա հետ չի պատահել՝ ասում են ընտանիքի անդամները, իսկ նման վիճակում հայտնվելու պատճառը, պնդում են՝ ծեծն է եղել։ Ասում են՝ սա հասկացել են զառանցելու ժամանակ տղայի արած կցկտուր արտահայտություններից ու հնչեցրած անուններից։ Ցնցումների ժամանակ տղան անընդհատ իրեն վնասելու, երկաթով հարվածելու վախ է ունեցել։
Տիկին Գայանեն ոստիկանությունում հանցագործության մասին հաղորդում է ներկայացրել։ Տղայի խնդիրները պարզելու համար նրան Հայ-կանադական բժշկական կենտրոն են բերել։
Արյան մեջ թմրանյութի առկայությունը հերքելու համար արյան անալիզ դեռ չեն իրականացրել։ Տղային արդեն դեղորայքային բուժում են նշանակել, կգումարվի նաև հոգեբանական աշխատանքը և խնդիրը կհաղթահարեն՝ հույս է հայտնում բժիշկը։
«Հրազդան» բժշկական կենտրոնից մեզ մեկնաբանություն չտվեցին՝ առաջարկելով սպասել մինչև երկուշաբթի։ Թեև Հրազդանի բուժկենտրոնն Առողջապահության նախարարության ենթակայությամբ չի գործում, այդուհանդերձ, նախարարությունից մեզ տեղեկացրեցին, որ դեպքին ծանոթ են և վերլուծում են իրավիճակը՝ հասկանալու համար, թե ինչումն է խնդիրը։
Մանրամասները՝ տեսանյութում։
Սաթենիկ Հայրապետյան
