08.06.2026 | 12:24
Հայաստանի ժողովուրդը քվեարկել է խաղաղության և կայունության համար․ Անտոնիո Կոշտան շնորհավորել է Փաշինյանին
Ռուսաստանից Հայաստան եկած գումարներն ավելացել են, ԱՄՆ-ից՝ պակասել
Տնտեսություն
17.06.2022 | 16:57
Այս տարվա ապրիլին ֆիզիկական անձանց անունով բանկերի միջոցով արտերկրից ստացված փոխանցումների զուտ ներհոսքը՝ այսինքն այն գումարը, որ եկել և մնացել է Հայաստանում, կազմել է 207 մլն 220 հազար դոլար։ Այս մասին տեղեկանում ենք ԿԲ հրապարակած տվյալներից։
Նախորդ ամսվա՝ մարտի հետ համեմատ Հայաստան ուղարկված դրամական փոխանցումներն ավելի քան կրկնապատկվել են։ 2022 թվականի ապրիլի և 2021 թվականի ապրիլի համեմատությունը ցույց է տալիս, որ այս տարի ՀՀ ֆիզիկական անձանց փոխանցված գումարները եռապատկվել են։
Հայաստան եկող գումարների մեծ մասը փոխանցվում է Ռուսաստանից։ Այսպես․այս տարվա ապրիլին Ռուսաստանից Հայաստան է փոխանցվել ավելի քան 191 մլն դոլար, մարտ ամսվա 51 մլն դոլարի փոխարեն։ Այսպիսով՝ ապրիլին մարտ ամսվա համեմատ ՌԴ-ից եկող գումարները գրեթե քառապատկվել են։
Իսկ նախորդ տարվա ապրիլին ՌԴ-ից Հայաստան է եկել 28,5 մլն դոլար։ Այսինքն՝ այս տարվա ապրիլին՝ նախորդ տարվա ապրիլի համեմատ ՌԴ-ից եկող գումարները ավելի են 162,5 մլն դոլարով կամ գրեթե 7 անգամ։ Այս տարի փոխանցումների էական աճը կապված է նաև ռուս-ուկրաինական պատերազմի մեկնարկից հետո ՌԴ տասնյակ հազարավոր քաղաքացիների ներհոսքի հետ։
ԱՄՆ-ից Հայաստան եկող փոխանցումների զուտ ներհոսքն, ընդհակառակը, նվազում է գրանցել։ Այս տարվա ապրիլին ֆիզիկական անձանց անունով բանկերի միջոցով ԱՄՆ-ից ստացված փոխանցումների զուտ ներհոսքը կազմել է 33 մլն դոլար նախորդ ամսվա՝ մարտի 35 մլն դոլարի փոխարեն։
Նախորդ տարվա ապրիլին ԱՄՆ-ից Հայաստան եկած գումարը կազմել է շուրջ 34 մլն դոլար։ Այսինքն՝ նվազում է նկատվում նաև այս տարվա ապրիլը նախորդ տարվա ապրիլի հետ համեմատ։
