09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
Մարդը 200 դոլարով պետական գաղտնիք է վաճառել․ այս մեծ վնասը չէր լինի, եթե բացահայտվեր մինչև պատերազմը․ Գարեգին Միսկարյան. ՏԵՍԱՆՅՈՒԹ
Քաղաքականություն
16.06.2022 | 20:32
Վերջին շրջանում համարյա ամեն ամիս ՀՀ ԱԱԾ-ն հայտնում է ենթադրյալ դավաճանական բացահայտումների մասին։ Ըստ ԱԱԾ-ի՝ բանակում ներդրված օտարերկրյա գործակալները, որոնք զինվորականներ են, բանակի, զինատեսակների մասին տեղեկություններ են հաղորդել օտարերկրյա հատուկ ծառայություններին։ Որոշ դեպքերում այդ ինֆորմացիայի հիման վրա Ադրբեջանը ոչնչացրել է ռազմական օբյեկտներ, մեծ ծավալի վնասներ հասցրել պատերազմում հայկական կողմին։ Մի քանի տասնյակ կալանավորված անձի մասին է խոսքը։ Նախ՝ ինչո՞ւ են նման քանակի դեպքեր բացահայտվում պատերազմից հետո, և եթե ՀՀ-ն ժողովրդավարական պետություն լիներ, պետության անվտանգությունը ի՞նչ վիճակում կլիներ։
«Ժողովրդավարական հարթակ» հիմնադրամի ղեկավար Գարեգին Միսկարյանը Factor TV-ի հարցազրույցում ասում է, որ պատերազմից հետո ենթադրյալ դավաճանական մեծաթիվ դեպքերի բացահայտումը նշանակում է՝ քաոսից մտել ենք պարզության փուլ․ «Գուցե նաև ԱԱԾ-ի աշխատանքի ոճը, թիրախներն ու նպատակներն են փոխվել, գուցե քաղաքական խնդիր կա դրած՝ բացահայտելու պարտության պատճառները, և այդ ճանապարհին նաև առանձին այդպիսի դեպքեր են բացահայտվում։ Էական չէ, թե ինչու է բացահայտվում, կարևոր է, որ բացահայտվում է»։
Ըստ նրա՝ արժեհամակարգային հարց է այն, որ մարդը կարող է 100-ից 200 դոլարով վաճառել պետական գաղտնիք հանդիսացող տեղեկությունը օտարերկրյա հատուկ ծառայություններին։
«Երբ մենք ասում ենք, որ ժողովրդավար պետություն լինելով՝ մենք ապահովագրված կլինենք նման դեպքերից, պետք է հասկանալ, որ ժողովրդավարությունը շատ լայն հասկացություն է, և լայն են քաղաքացուն տրվող հնարավորությունները։ Եթե մենք իրապես կայացած ժողովրդավար պետություն լինեինք, անգամ եզակի դեպքերը շատ շուտ կբացահայտվեին, և գործը պատերազմին չէր հասնի, մեծ վնասարարություն չէր լինի»,- նշում է «Ժողովրդավարական հարթակ» հիմնադրամի ղեկավար Գարեգին Միսկարյանը։
Հարցազրույցն ամբողջությամբ՝ տեսանյութում։
Ռոբերտ Անանյան
