Հասարակություն
14.06.2022 | 11:53ՀՀ կառավարության աջակցությամբ իրականացվող պետական ծրագրի շրջանակում Հայաստանի քաղաքացիների համար հասանելի կլինեն ամբողջական կամ մասնակի փոխհատուցվող վարկային առաջարկները՝ ուղղված բնակարանների, անհատական տների էներգաարդյունավետ վերանորոգմանը: Ընթացակարգային գործընթացները մոտենում են ավարտման փուլին, և մոտ օրերս քաղաքացիները հնարավորություն կունենան արդեն դիմելու և մատչելի վարկեր ստանալու:
ՀՀ քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչության պետ Տանյա Արզումանյանը, ներկայացնելով ծրագրի մանրամասները, նշեց, որ պետությունը մասնակի կամ ամբողջությամբ սուբսիդավորելու է վերանորոգման վարկի տոկոսադրույքը:
«Սուբսիդավորման պարագայում սահմանամերձ բնակավայրերի քաղաքացիների համար վարկը կլինի 0 տոկոս, այսինքն՝ առանց տոկոսի: Սահմանամերձ բնակավայր չհանդիսացող գյուղական բնակավայրերի համար վարկը կլինի 2 տոկոս, քաղաքային բնակավայրերի համար՝ 3 տոկոս, Երևանի բնակիչների համար՝ 5 տոկոս:
Ըստ ծրագրի՝ վարկի բանկային տոկոսադրույքը 14 տոկոս է, որի զգալի մասը կամ ամբողջությամբ, կախված բնակավայրից, պետությունը սուբսիդավորում է: Բազմաբնակարան շենքերի բնակարանների համար նախատեսված է առավելագույնը 7 մլն դրամի վարկ, իսկ անհատական տների համար՝ 10 մլն դրամ: Վարկի մարման առավելագույն ժամկետ է սահմանվել 7 տարի:
Ի՞նչ նկատի ունենք վերանորոգում ասելով և ի՞նչ է իրենից ենթադրում էներգաարդյունավետ վերանորոգման բաղադրիչը:
Խոսքը տների ընթացիկ վերանորոգման ու ներքին հարդարման աշխատանքների մասին է, որոնք պետք է ուղեկցվեն էներգաարդյունավետության միջոցառումներով: Օրինակ, անհատական տների համար արտաքին պատերի ջերմամեկուսացում՝ տանիք, նկուղ և այլն: Դրանից բացի, դռների լուսամուտների փոխարինում, այլընտրանքային էներգիայի աղբյուրների ձեռքբերում տեղադրում, արևային պանելների մասին է խոսքը, էներգախնայող ջեռուցման համակարգ և այլն: Ամեն ինչ, ինչը էներգախնայող է»,- նշեց Արզումանյանը:
Ծրագրում չեն կարող ընդգրկվել այն տները, բնակարանները, որոնք վթարային են: Հետևաբար, քաղաքացիները վարկ վերցնելիս պետք է ներկայացնեն նաև լիցենզավորված կազմակերպության կողմից տրված եզրակացություն տան տեխնիկական վիճակի վերաբերյալ:
Մանրամասները՝ տեսանյութում:
