Չեմ պատասխանի, նորից Փառուխը հիշատակեցիք. պաշտպանության փոխնախարար․ ՏԵՍԱՆՅՈՒԹ

«Մի՛ մտահոգվեք, նորից ունենալու ենք Գլխավոր շտաբի պետ, որն ուղղակի նաև հանդիսանալու է պաշտպանության նախարարի առաջին տեղակալը»,- ԱԺ-ում լրագրողների հետ զրույցում նշեց ՀՀ պաշտպանության փոխնախարար Արման Սարգսյանը՝ անդրադառնալով կառավարության օրենսդրական նախաձեռնությանը, ըստ որի՝ Գլխավոր շտաբի պետը ենթարկվելու է պաշտպանության նախարարին և դառնալու է նրա տեղակալը, սակայն չի հանդիսանալու նախարարին փոխարինող անձ։

«Գլխավոր շտաբը որպես պետական ենթակա մարմին կրկին շարունակելու է իր կարգավիճակը պահել», – ասաց փոխնախարարը։

Հարցին, թե որն է այդ փոփոխության նպատակը, գուցե այն, որ քաղաքական վերահսկողություն լինի, Արման Սարգսյանը պատասխանեց. «Մամուլում էլ են գրում, թե ինչպես կլինի, որ քաղաքական ղեկավարը ղեկավարի զինվորականին. այս պահին էլ ղեկավարում է, միշտ է ղեկավարել։ Այդ հարցով որևէ խնդիր չկա, որ ոչ զինվորականը զինվորականին պետք է ղեկավարի։ Դրանք իրական բարեփոխումներ են»։

Սարգսյանի խոսքով՝ օրենսդրական այս կարգավորմամբ զինվորականները ֆինանսական և գնման գործընթացներից հեռու կլինեն։

Անդրադառնալով  Լավրովի հայտարարությանը և դիտարկմանը, որ կա կարծիք, թե Հայաստանի իշխանությունն այնքան վատ է ներկայացրել իրավիճակը, որ Լավրովը չի պատկերացնում Փառուխը ՀՀ տարածքում է, թե Ադրբեջանի, Սարգսյանը պատասխանեց. «Նման բան չի կարող լինել, ՀՀ-ն ամեն ինչ ներկայացնում է ի շահ ՀՀ-ի, ի շահ Արցախի, ի շահ մեր անվտանգության, և նման մտահոգություն պետք չէ ունենալ»:

Հարցին՝ զարմանալի՞ չէ հայտարարությունն ան մասին, որ Փառուխի հարցը լուծվելու է ահմանազատման առարկայական աշխատանքներ սկսելու շրջանակում, Սարգսյանն արձագանքեց. «Այդ հարցն ողղեք այն մարմնին, որը հանագամանալից կարող է պատասխանել»:

Անդրադառնալով հարցին, թե ինչու կյանքի չի կոչվում ՌԴ պաշտպանության նախարարության հայտարարությունը Փառուխից ադրբեջանական զորքերի՝ ելման դիրքեր հետքաշման վերաբերյալ, Սարգսյանը նշեց. «Չեմ պատասխանելու… Նորից Փառուխ բառը հիշատակեցիք»:

Մանրամասները՝ տեսանյութում: