ՌԴ-ն արդե՛ն պատժվում է․ ՀՀ-ն ճիշտ արեց՝ պատերազմական հանցանքը չսատարելով․ Ռուբեն Մեհրաբյան. ՏԵՍԱՆՅՈՒԹ

Այն աշխարհակարգը, որ գոյություն ուներ մինչև փետրվարի 24-ը, այլևս գոյություն չունի, այն փլուզվեց։ Նոր աշխարհակարգն առայժմ չկա, բայց այն ստեղծվում է ռուս-ուկրաինական պատերազմի բովում, նաև՝ դրա շուրջ մարտերի արդյունքում։ Factor TV-ի հարցազրույցում Ուկրաինայի դեմ Ռուսաստանի սանձազերծած պատերազմի 100 օրը այսպիսի գնահատական է հնչեցնում «Հանուն Հանրապետության» կուսակցության փոխնախագահ Ռուբեն Մեհրաբյանը։

Պատերազմի ընթացքը կարող է փոխվել օր օրի։ ԱՄՆ-ն արդեն քննարկում է Ուկրաինային մեծ մարտական անօդաչու թռչող սարքերի վաճառքի հարցը: Grey Eagle անօդաչուները, ըստ փորձագետների, մոտ երեք անգամ հզոր են թուրքական Bayraktar-ներից։ Դրանք կարող են համալրվել ավելի հզոր զենքերով, մասնավորապես՝ Hellfire հրթիռներով:

ԱՄՆ-ն և Գերմանիան նաև Ուկրաինային ռուսականից ավելի մեծ հեռահարության հրետանի տրամադրելու որոշում են կայացրել։ ՌԴ ՊՆ-ն էլ հայտնել է միջուկային հրթիռներով զորավարժություն սկսելու մասին։ «Յարս» կոչվող միջուկային մոբիլ հրթիռների արձակման համակարգերը կարող են հարվածել 11 հազար կիլոմետրի վրա գտնվող թիրախներ։ Այսպիսով, մեծանում է նաև անկանխատեսելի զարգացումների հավանականությունը՝ արդյո՞ք գործը կհասնի միջուկային պատերազմի, թե՞ համաձայնություններ դեռ հնարավոր են։

Թերևս, Ուկրաինայի դեմ պատերազմ սկսելու՝ ՌԴ-ի ղեկավարության որոշումն է, որ Ալիևին հիմք է տվել օրերս Զանգելանում հայտարարելու, թե չկա միջազգային իրավունք, աշխարհում առաջին տեղում ուժն է՝ հերթական անգամ սպառնալիքներ հնչեցնելով ՀՀ-ի հասցեին։

«Ալիևը չարաչար սխալվում է, որովհետև այն, ինչ արեց Ռուսաստանը, հենց դրա համար ինքը պատժվում է, հիմա հենց դա է տեղի ունենում։ Եթե Ալիևն ուզում է դա նաև իրեն հասնի, կարող է փորձել բախտը»,- նշում է Ռուբեն Մեհրաբյանը։

Ըստ նրա՝ ՀՀ-ն այս ընթացքում շատ կարևոր քաղաքական որոշումներ է ընդունել, որոնցից առաջինն ու կարևորագույնը ՌԴ-ին չսատարելն է «այս հանցավոր պատերազմում»։

Հարցազրույցն ամբողջությամբ՝ տեսանյութում։

Ռոբերտ Անանյան