06.10.2026 | 00:38
Ազգերի լիգա. Հայաստանի հավաքականը ոչ-ոքի խաղաց Չեռնոգորիայի հետ
Միասնական սոցիալական ծառայության հերթապահության ինստիտուտ պետք է ներդնենք․ նախարար․ ՏԵՍԱՆՅՈՒԹ
Քաղաքականություն
03.06.2022 | 12:18
«Միասնական սոցիալական ծառայություններում հերթապահության ինստիտուտի ներդրման կարիք կա, սկզբնական շրջանում` գոնե մարզերում»,- այս մասին ԱԺ աշխատանքի և սոցիալական հարցերի ու ֆինանսավարկային բյուջետային հարցերի մշտական հանձնաժողովների համատեղ նիստում ասաց ՀՀ աշխատանքի և սոցիալական հարցերի նախարար Նարեկ Մկրտչյանը՝ հավելելով, որ այդ ուղղությամբ աշխատանքներ են իրականացվում:
Նախարարն ընդգծեց, որ համայնքներում միասնական սոցիալական ծառայությունները պետք է դարձնել աշխատող, կենդանի օրգանիզմ, որոնք կզգան համայքի խնդիրները, ինչն էլ երեխաների պաշտպանության հետ կապված խնդիրները կանխարգելելու հնարավորություն կտա:
«Օրինակ՝ Դեբեդ գետը նետված երեխայի դեպքի հետ կապված` միասնական սոցիալական ծառայությունը գործուն մասնակցություն ունի` խորքային գնահատում պետք է իրականացվի, որպեսզի հասկանանք պատճառներն ու շարժառիթները։ Երեխան այժմ ժամանակավոր կացարանում է, մինչև նրա կարգավիճակի հարցը կլուծվի»,- նշեց Մկրտչյանը։
Նախարարը կարևորեց պետական մարմինների իրազեկվածությունը. «Երբ որ կարողանում ենք ՏԻՄ-երի, մյուս գերատեսչությունների և քաղաքացիների կողմից իրազեկվել, փորձում ենք արագ արձագանքել: Միասնական սոցիալական ծառայություններում հերթապահության ինստիտուտի կայացումը արագ արձագանքման հնարավորություն կտա»:
Մանրամասները՝ տեսանյութում:
