Քաղաքականություն
04.05.2018 | 18:10
ՀՅԴ ԳՄ անդամ Արթուր Եղիազարյանը ֆեյսբուքյան իր էջում կցել է Աղվան Վարդանյանի խոսքը՝ կուսակցության շարքերից հեռացման ՀՅԴ ԳՄ որոշումից հետո. «Ներկայացնում եմ Աղվան Վարդանյանի խոսքը՝ ՀՅԴ ԳՄ-ի՝ իր հեռացման մասին որոշումից հետո։ Բոլորից խնդրում եմ հարգալից վերաբերմունք՝ Մարդու անձնական կարծիքի հանդեպ ու ոչ մի ավելորդ գրառում՝ իմ պատին։ Շնորհակալություն»:
«Դաշնակցության համար ես երկու անգամ եմ երդվել: Առաջինը՝ 1990թ. ապրիլի 26-ին՝ անդամագրվելիս: Երկրորդը՝ 1996թ. ապրիլի սկզբին, Աթենքից Երևան վերադառնալուց առաջ, կոմայի մեջ Մարդու մահճակալի մոտ: Այս երդումը կուսակցության վարկը միշտ բարձր պահելու խոստում էր:
Ազգային ժողովում իմ վերջին՝ խղճով ու համոզմունքով ելույթ-կեցվածքը անհատական պատասխանատվության դրսևորում էր՝ երդմանս հավատարիմ:
Մնացածը տասներորդական է:
Սեփական տեսակետ ունեցողներին ժողովուրդը, հավաքականությունները դժվար են հանդուրժում: Հետո ժամանակը պարզում է ջրերը. հեռացողները, երբեմն, վերադառնում են, հեռացնողները, երբեմն, մոռացվում:
Երբեմն:
Բայց սա էլ է տասներորդական:
Գլխավորը՝ կոնկրետ իրավիճակում, կոնկրետ պահին, ով՝ ինչ է անում:
Ասված է՝ արա՛ ինչ որ ճիշտ է, թող լինի՝ ինչ լինելու է:
Այսքանը՝ ինձ Դաշնակցությունից հեռացնելու ՀՅԴ Հայաստանի Գերագույն մարմնի որոշման վերաբերյալ»:
