20.11.2024 | 09:31
ՀՀ տարածքում ավտոճանապարհներն անցանելի են
Բարդ վիճակ է՝ ՀՀ-ն ընկալվում է ՌԴ-ի արբանյակ․ Փաշինյանի խոսքը ՀԱՊԿ-ում ուրիշ ուղերձ չէր Արևմուտքին․ Բորիս Նավասարդյան․ ՏԵՍԱՆՅՈՒԹ
Քաղաքականություն
31.05.2022 | 20:02
Ինչպիսի՞ ազդեցություն կունենա Ուկրաինայի դեմ ՌԴ-ի սանձազերծած պատերազմի արդյունքը ՀՀ-ի վրա։ Երբեմն գնահատելիս քաղաքակրթական տարր է դրվում գլոբալ այս բախման մեջ, ըստ որի՝ ազատ պետությունը, ի դեմս Ուկրաինայի, պայքարում է իր ճակատագիրը տնօրինելու սուվերեն իրավունքի համար։ Իսկ ի՞նչ հարվածներ կստանա ՀՀ-ի ինքնիշխանությունը և ի՞նչ ռիսկերի կենթարկվի ՀՀ-ի ժողովրդավարական ընթացքն ապագայում՝ անկախ իշխանությունների «ով» լինելուց։
Հասարակության որոշ շերտեր ողջունեցին Նիկոլ Փաշինյանի քննադատությունը ՀԱՊԿ-ի ելույթում, որ 44-օրյա պատերազմում, ադրբեջանական ներխուժումների ժամանակ չի աջակցել ՀՀ-ին։ Երևանի մամուլի ակումբի նախագահ Բորիս Նավասարդյանը Factor TV-ի հարցազրույցում պնդում է, որ արտաքին աշխարհին միևնույն է՝ քաղաքական ինչպիսի կարգեր կլինեն ՀՀ-ում։ Ըստ նրա՝ ՀՀ-ի նկատմամբ վերաբերմունքը պայմանավորված է լինելու նրա աշխարհաքաղաքական վեկտորի հետ։
«Ցավոք, այսօր մենք տեսնում ենք ակնհայտ միտում, որ Հայաստանն ընկալվում է որպես ՌԴ-ի ծիրի մեջ գտնվող երկիր, որ այդ գծից շատ քիչ շեղումներ է թույլ տալիս, նույնիսկ՝ միջազգային կառույցներում պատերազմի համատեքստում չեզոք, ՌԴ-ին չպաշտպանող քվեարկությունները հաշվի առնելով։ Մենք այդ ճամբարում հայտնվելով՝ գնալով ավելի բարդ վիճակում ենք հայտնվում»,- ասում է Երևանի մամուլի ակումբի նախագահը։
Բորիս Նավասարդյանը Հայաստանի աշխարհաքաղաքական կողմնորոշման հետ է կապում նաև Լեռնային Ղարաբաղի նկատմամբ արտաքին ուժերի վերաբերմունքը․ «Ցավոք, ոչ մեկին չի հետաքրքրում, թե ինչպիսին է լինելու Արցախի հայության ապագան։ Համարում են, որ եթե Արցախը ստանա կարգավիճակ, որը ձեռնտու է Հայաստանին, որը մնում է Ռուսաստանի կցորդը, էլ ինչի՞ մեջ է մեր շահագրգռվածությունը, որ Արցախը լինի այսպիսին, և ոչ թե պատկանի Ադրբեջանին։ Այսպիսին է աշխարհաքաղաքական շահագրգռվածությունը։ Շատ քչերին է հետաքրքրում՝ մենք ժողովրդավարակա՞ն ենք, թե՞ ոչ։ Դա մեզ համար է»։
Հարցազրույցն ամբողջությամբ՝ տեսանյութում։
Ռոբերտ Անանյան
