Տնտեսություն
31.05.2022 | 12:52Այսօր 2021թ-ի բյուջեի կատարողականի քննարկման ժամանակ, դիմելով ՀՀ ֆինանսների նախարար Տիգրան Խաչատրյանին, »Քաղաքացիական պայմանագիր» խմբակցության պատգամավոր Վահագն Հովակիմյանը հետաքրքրվեց, թե ինչու պետական համակարգի աշխատակիցներին տրվող հավելավճարներն ու պարգևավճարները չեն հաշվառվում նրանց աշխատավարձերի մեջ:
«Շատ կարևոր է, երբ մենք երկարաժամկետ առումով բարձրացումներ ենք սահմանում, հաշվի առնենք, որ լավ ժամանակներում այդ պարգևավճարները կարող են տրվել, իսկ ճգնաժամային իրավիճակներում դրանց վճարումը կարող է սահմանափակվել»- պարզաբանեց նախարարը։
Նրա խոսքով՝ պարգևավճարի համակարգը հնարավորություն է տալիս խրախուսել արդյունավետ աշխատանքը։ Նախարարի դիտարկմամբ՝ վճարվող գումարի անունը փոխելն այդ գումարը ստացողի կյանքում ոչինչ չի փոխի, բայց կարող է վնասել աշխատանքի արդյունավետությանը։
Խաչատրյանը պարզաբանեց, որ 30 տոկոս պարգևավճարը բաղկացած է քաղաքացիական ծառայողներին տրվող աշխատավարձի 10 տոկոսի չափով պարգևավճարից ու պետական համակարգի բոլոր աշխատակիցների համար սահմանված 20 տոկոս լրացուցիչ պարգևավճարից։
Վահագն Հովակիմյանը հիշեցրեց, որ պարգևավճարի համակարգը քաղաքական շահարկումների լայն հնարավորություն է տալիս, մինչդեռ դրանից խուսափելու արդյունավետ տարբերակը այդ գումարը աշխատավարձի չափի մեջ ներառելը կարող է լինել։
«Տվյալ դեպքում 20 տոկոսն է այն ավելացումը, որ արվել է 2018թ–ին, այսինքն` 10–ը եղել է, 20-ը` ավելացվել։ Խնդրեմ` այդ 20-ով եկեք խնդիրը լուծենք, այն 10-ը թող մնա ձեր ասած` խրախուսման ֆոնդը»,- նշեց պատգամավորը։
Նախարարը պատասխանեց, որ այդ հարցի պատասխանատուն միայն ինքը չէ. «Դա կառավարության որոշելիք խնդիրն է… Հետևանքները պետք է քննարկել»:
Մանրամասները՝ տեսանյութում:
