Քաղաքականություն
30.05.2022 | 23:30
Թուրքիայի նախագահ Ռեջեփ Թայիփ Էրդողանը կրկին սպառնալիքներ է հնչեցրել և բողոքել Հունաստանից։ Թուրքական լրատվամիջոցների փոխանցմամբ՝ Էրդողանը նշել է, թե վերջ են դրել Հունաստանի հետ ռազմավարական խորհրդի ձևաչափի շրջանակներում հանդիպումներին ու բարձր մակարդակով հայտարարել այդ մասին։
«Դա ի՞նչ է նշանակում։ Դա նշանակում է՝ Հունաստան, կարգի՛ բեր քեզ։ Միցոտակիսը՝ Հունաստանի վարչապետը, իմ զրուցակիցը չէ այլևս։ Ինչո՞ւ, որովհետև ես չեմ շփվում մարդկանց հետ, որոնք քաղաքականությունն օգտագործում են անձնական նպատակներով»,- ասել է Թուրքիայի նախագահը՝ կրկին հիշելով Միցոտակիսի ԱՄՆ կատարած այցը։
«Սկզբում դու ինձ հետ շփվում ես, մենք ճաշում ենք, խոսք ենք տալիս երրորդ երկրներին մեր հարաբերություններին չխառնել։ 15 օր անց գնում ես ԱՄՆ ու ելույթ ունենում Կոնգրեսում Թուրքիայի դեմ հայտարարություններով՝ ծափահարություններ ստանալով։ Նաև մեծ սպառազինություններ։ Մենք նրանց հետ չենք ուզում գործ ունենալ։ Մենք ընկեր ենք ընկերների համար, սակայն Հունաստանը, պետք է իմանա, որ մենք կպատասխանենք նրանց, որոնք մեզ թշնամու աչքերով են նայում»,- ասել է Էրդողանը։
Հիշեցնենք, որ օրերս Էրդողանը հայտարարել էր, թե Հունաստանի վարչապետ Կիրիակոս Միցոտակիսն իր համար «այլևս գոյություն չունի», և նրան մեղադրել էր ԱՄՆ կատարած այցի ժամանակ Թուրքիային F-16 կործանիչների վաճառքն արգելափակելու փորձի մեջ։
Էմմա Չոբանյան
