17.12.2025 | 17:03
Մհեր Գրիգորյանն ընդունել է Ալեքսեյ Օվերչուկին․ ստորագրվել են մի շարք երկկողմ փաստաթղթեր
Մհեր Գրիգորյանը կառուցողական է որակել սահմանների դելիմիտացիայի հարցով Ադրբեջանի հանձնաժողովի հետ հանդիպումը
Քաղաքականություն
27.05.2022 | 14:57
Սահմանների սահմանազատման և անվտանգության հարցով Հայաստանի և Ադրբեջանի հանձնաժողովների առաջին նիստը, որը տեղի է ունեցել մայիսի 24-ին երկու երկրների միջպետական սահմանին, անցել է կառուցողական մթնոլորտում։ Այս մասին ՏԱՍՍ-ի թղթակցի հետ զրույցում ասել է ՀՀ փոխվարչապետ, Հայաստանի հանձնաժողովի նախագահ Մհեր Գրիգորյանը։
«Մայիսի 24-ին մենք առաջին հանդիպումն անցկացրինք սահմանին, քննարկեցինք բացառապես կազմակերպչական հարցեր՝ կապված հետագա համատեղ աշխատանքի հետ, և այս առումով հանդիպումը համարում եմ բավականին կառուցողական։ Դեռևս պայմանավորվածություններ չկան սահմանազատման և սահմանների անվտանգության հարցերի հանձնաժողովների հաջորդ նիստի ժամկետի վերաբերյալ, սակայն հաստատումներ կան, որ հանդիպումը տեղի կունենա Մոսկվայում»,- ասել է նա։
Գրիգորյանը հաստատել է, որ հաջորդ շաբաթ Մոսկվայում Հայաստանի, Ռուսաստանի և Ադրբեջանի փոխվարչապետների համանախագահությամբ նախանշված է տարածաշրջանում տրանսպորտային և տնտեսական կապերի ապաշրջափակման եռակողմ աշխատանքային խմբի նիստը։
«Այս հանդիպման կոնկրետ ժամկետն այժմ համաձայնեցման փուլում է, հանդիպման օրակարգում ներառված են Հայաստանի, Ռուսաստանի և Ադրբեջանի ղեկավարների եռակողմ հայտարարության 9-րդ կետում նշված պայմանավորվածությունների կատարման հետ կապված հարցեր։ Այս օրակարգը սահմանազատման հետ կապ չունի»,- հավելել է նա։
