17.12.2025 | 21:10
ՌԴ-ի ներգրավումը Թրամփի ուղուն՝ գեոպոլիտիկ բախման կբերի․ փորձում է խոչընդոտել նախագծի իրականացմանը․ Արմեն Պետրոսյան. ՏԵՍԱՆՅՈՒԹ
Էնթոնի Բլինքենը Փաշինյանին սահմանների դելիմիտացիայի հարցում օգնություն է առաջարկել
Քաղաքականություն
25.05.2022 | 11:55
ՀՀ վարչապետ Նիկոլ Փաշինյանի ու ԱՄՆ պետքարտուղար Էնթոնի Բլինքենի միջև նախօրեին տեղի ունեցած հեռախոսազրույցի մասին հաղորդագրություն է տարածել նաև ամերիկյան կողմը։ Այս մասին տեղեկանում ենք Պետքարտուղարության պաշտոնական կայքից։
Նշվում է, որ Բլինքենն ու Փաշինյանը քննարկել են Հարավային Կովկասում խաղաղությանն ուղղված դրական ազդակները։
«Պետքարտուղար Բլինքենը Միացյալ Նահանգների օգնությունն է առաջարկել սահմանների սահմանազատման և սահմանագծման ջանքերում և խրախուսել առաջընթացը տարածաշրջանային տրանսպորտային և հաղորդակցական կապերի զարգացման ուղղությամբ: Նա ընդգծել է երկկողմ երկխոսության շարունակման կարևորությունը Հարավային Կովկասում առկա մարտահրավերները լուծելու համար և վերահաստատել ԱՄՆ աջակցությունը ԵՄ միջնորդությամբ նախագահ Ալիևի և վարչապետ Փաշինյանի միջև բանակցություններին»,-ասվում է հաղորդագրության մեջ։
Բլինքենը վերահաստատել է ԱՄՆ-ի պատրաստակամությունը՝ օգնելու Հայաստանին և Ադրբեջանին գտնել երկարաժամկետ համապարփակ խաղաղություն երկկողմ ձևաչափով և համախոհ գործընկերների ներգրավմամբ, այդ թվում՝ որպես ԵԱՀԿ Մինսկի խմբի համանախագահ։
ԱՄՆ պետքարտուղարն ընդգծել է նաև Հայաստանի ու Թուրքիայի միջև հարաբերությունների կարգավորման կարևորությունը՝ ամբողջ տարածաշրջանում խաղաղության, կայունության ու բարգավաճման ապահովման համար։
Էմմա Չոբանյան
