26.11.2024 | 16:34
Ալեն Սիմոնյանը հրաժեշտի հանդիպում է ունեցել ՀՀ-ում Իտալիայի դեսպան Ալֆոնսո Դի Ռիզոյի հետ
ԱՄՆ հետախուզությունն ուկրաինացիներին օգնել է ոչնչացնել բազմաթիվ ռուս գեներալների․ The New York Times
Քաղաքականություն
05.05.2022 | 12:43
The New York Times-ը հոդված է հրապարակել՝ հիմնված ամերիկյան անանուն աղբյուրների վրա, որոնք պատմել են, որ ԱՄՆ-ի կողմից Ուկրաինային տրամադրած հետախուզական տվյալներն օգտագործվել են ռուս գեներալներին ոչնչացնելու համար հարվածների ժամանակ:
Միևնույն ժամանակ, աղբյուրները նշում են, որ ոչ բոլոր հարվածներն են եղել ամերիկյան տվյալների հիման վրա։ Մասնավորապես, ապրիլի 30-ին Իզյումի հրամանատարական կետին հարվածը, որտեղ դրանից քիչ առաջ գտնվել է ՌԴ Գլխավոր շտաբի պետ Վալերի Գերասիմովը, չի եղել ամերիկյան տեղեկատվության հիման վրա։
Ռուսաստանը չի հաղորդել Իզյումին հարվածելու, նույնիսկ Գերասիմովի արևելյան Ուկրաինա մեկնելու մասին: Սակայն այս մասին մի քանի օր առաջ լրատվամիջոցներին հայտնել են ամերիկյան հետախուզական համայնքի աղբյուրները։ Որոշ ուկրաինացի պաշտոնյաներ նույնիսկ հայտարարել են, որ Գերասիմովն ինքն էլ է հայտնվել կրակի տակ և վիրավորվել, սակայն ոչ ոք չի հաստատել այդ պնդումները՝ ո՛չ ուկրաինացի այլ պաշտոնյաներ, ո՛չ ամերիկացիները, ո՛չ Մոսկվան։
The New York Times-ի հոդվածում աղբյուրները պնդում են, որ Վաշինգտոնը թույլ չի տա իր տվյալներն օգտագործել Ռուսաստանի բարձրագույն ռազմական ղեկավարության դեմ մահափորձի համար, որոնց թվում է Գերասիմովը:
Պենտագոնը դեռևս չի մեկնաբանել այս հոդվածը։
Ուկրաինան պնդում է, որ պատերազմի սկզբից ի վեր ռազմաճակատում զոհվել է 12 բարձրաստիճան ռուս սպա, ինչն անոմալ թիվ է, առնվազն արևմտյան բանակների չափանիշներով, նշում են արևմտյան փորձագետները։ Ռուսաստանը պաշտոնապես հաստատել է երկու փոխհրամանատարների՝ գեներալ-մայոր Անդրեյ Սուխովեցկու և գեներալ-մայոր Վլադիմիր Ֆրոլովի մահը։
Միացյալ Նահանգները վերջերս բացահայտ խոստովանել է, որ Ուկրաինայի հետ կիսում է հետախուզական տվյալների լայն շրջանակ: ՆԱՏՕ-ում ԱՄՆ-ի դաշնակիցները ևս իրենց հետախուզական գործակալություններից տեղեկատվություն են տրամադրում Կիևին։
Տաթև Ֆռանգյան
