20.11.2024 | 13:34
Արփինե Սարգսյանը նշանակվեց ՆԳ նախարար
Ինչպիսի ազդեցություն կարող են ունենալ ԱԺ-ի շենքի բակում տեղադրված լուսաձայնային նռնակները, եթե կիրառվեն
04.05.2022 | 14:59
Պայթյունի խլացնող ձայն ու կուրացնող լուսարձակում․ Ազգային Ժողովի շենքի բակում տեղադրված լուսաձայնային նռնակները նման ազդեցություն կունենան ցուցարարների վրա, եթե կիրառվեն։ Factor TV-ն այսօր ավելի վաղ ֆիքսել էր, որ Նիկոլ Փաշինյանի՝ Ազգային ժողով այցից առաջ խորհրդարանի պարսպից այն կողմ տեղադրվել են այդպիսի հատուկ միջոցներ։
Դրանք նախատեսված են անկարգությունների մասնակիցներին և հանցագործներին ժամանակավորապես չեզոքացնելու համար։ Այս նռնակների պայթյունի ձայնը մինչև մի քանի ժամով մարդուն կարող է զրկել լսողությունից, իսկ լուսարձակումը ժամանակավոր՝ մինչև 30 վայրկյան տևողությամբ զրկել տեսողությունից։ Դրանց ազդեցությունից հետո իրավապահները սովորաբար դիմում են այլ գործողությունների և ձերբակալում իրավախախտներին։
Աշխարհում գործնականում հազվադեպ են եղել դեպքերը, երբ այսպիսի նռնակների կիրառումը լուրջ վնասվածքներ է հասցրել։ Կախված նռնակի մոդելից՝ առողջության համար անվտանգ է համարվում դրա կիրառումը 10-15 մետր հեռավորությունը։ Այսպիսի նռնակները բեկորներ կամ չեն առաջացնում, կամ դրանց բեկորները անվնաս են նշված տարածությունից։
Բայց հատկապես փակ տարածքում ու մարդուն մոտ պայթեցվելու դեպքում դրանք կարող են նաև առողջության լուրջ խաթարումների հանգեցնել, օրինակ՝ սրտի խնդիրներ ունեցողների շրջանում։
Նշենք, որ այսպիսի նռնակներ ԱԺ բակում տեղադրվել էին նաև 2021 թվականի մարտին, երբ ընդդիմությունը փակ էր պահում Բաղրամյան պողոտան, իսկ Փաշինյանը կրկին ԱԺ պետք է գար կառավարության հետ հարց ու պատասխանին մասնակցելու։ Այն ժամանակ մամուլում հրապարակված լուսանկարներից երևում էր, որ ԱԺ սենյակներում տեղակայվել են նաև դիպուկահարներ։
