ԱԱԾ-ն զբաղվում է Հովիկ Աբրահամյանի առանձնատան վաճառքով. կասկածելի ծագման գույքի վաճառքի համար «կանաչ լույս» կվառվի՞․ ՏԵՍԱՆՅՈՒԹ

Հովիկ Աբրահամյանի որդուն՝ Արգամ Աբրահամյանին պատկանող առանձնատունը, որը մեկ ամիս առաջ վաճառվել էր նորահայտ գործարար Նարեկ Նալբանդյանին, կրկին կալանքի տակ է հայտնվել: Գործով հիմա ԱԱԾ-ն է զբաղվում: Այս մասին Factor TV-ի հարցմանն ի պատասխան՝ նշել են Գլխավոր դատախազությունից:

2022թ. մարտի 28-ին Ազգային անվտանգության ծառայության քննչական դեպարտամենտում հարուցվել է քրեական գործ: Գլխավոր դատախազ Արթուր Դավթյանի հանձնարարությամբ ուսումնասիրվում է, թե ինչպես 2018 թվականի հոկտեմբերից կալանքի տակ գտնվող առանձնատունը հանվեց կալանքից և անմիջապես վաճառվեց:

ԱԱԾ-ում հարուցված քրեական գործով Աբրահամյանների առանձնատունն իրեղեն ապացույց է ճանաչվել և ձեռնարկվել են օրենքով նախատեսված միջոցներ՝ այն պահպանելու նպատակով։ Գլխավոր դատախազությունից Factor TV-ին հայտնեցին, որ կիրառվել է արգելանք, այսինքն՝ առանձնատունը չեն կարող օգտագործել ո՛չ Աբրահամյանները, ո՛չ էլ նոր գնորդ Նարեկ Նալբանդյանը:

Մոնումենտի բարձրունքում գտնվող Աբրահամյանների և նախկին այլ պաշտոնյաների շքեղ դղյակների ծագման օրինականությունը բացահայտելու նպատակով դեռևս 2018 թվականին էր քրեական գործ հարուցվել: 3.5 տարվա ընթացքում ոչինչ չէր բացահայտվել, իսկ ահա 2022 թվականին մարտի 1-ին Աբրահամյաններին հաջողվել էր վաճառել բնակարանը:

5 մլն դոլարով այս առանձնատունը գնել է նորահայտ գործարար Նարեկ Նալբանդյանի ընտանիքը, որը փետրվարին ձեռք էր բերել նաև Ծաղկաձորի «Գոլդեն Փելես» հյուրանոցը: Ըստ «Սիվիլնեթ»-ի՝ Նալբանդյաններն Աբրահամյաններին վճարել են 48 միլիոն դրամ, իսկ 2,452 միլիարդ դրամը վճարելու են մինչև օգոստոսի 1-ը։

Գլխավոր դատախազությունից Factor TV-ի հարցմանն ի պատասխան հայտնել են, որ միջոցներ են ձեռնարկվում հողամասի դիմաց վճարված գումարների նկատմամբ օրենքով նախատեսված սահմանափակումներ կիրառելու ուղղությամբ։

ԹԻՀԿ ծրագրերի համակարգող Վարուժան Հակտանյանը նշում է՝ մինչև ԱԱԾ-ում գործի քննության ավարտը առանձնատան համար վճարումների գործընթացը սառեցվելու է։

Աբրահամյանների առանձնատան առք ու վաճառքի գործարքը մարտի 13-ից սկսած տարաձայնությունների պատճառ է դարձել Գլխավոր դատախազության և ՀԿԿ-ի միջև: Factor TV-ն այդ օրը գլխավոր դատախազ Արթուր Դավթյանից հետաքրքվել էր, թե ինչպե՞ս ստացվեց, որ կալանքի տակ գտնվող տունը վաճառվեց, ինչին ի պատասխան՝ գլխավոր դատախազն ասել էր․ «Տարակուսած եմ»։

Սրան հաջորդեց Սասուն Խաչատրյանի ղեկավարած ՀԿԿ-ի արձագանքը, որը շարունակվեց մի քանի օր: Այսօր արդեն Գլխավոր դատախազությունից հայտնում են, որ ՀԿԿ-ի քննիչը, որն առանձնատան վրայից հանել էր կալանքը, օրենքի խախտում թույլ տալու հիմքով հեռացվել է վարույթից:

ԹԻՀԿ ծրագրերի համակարգող Վարուժան Հոկտանյանը նշում է՝ պետք է մինչև վերջ գնալ և բացահայտել, թե Աբրահամյանների տան վաճառքի շուրջ ինչ գործարք է տեղի ունեցել:

ԻՔՄ ծրագրերի համակարգող Դանիել Իոաննիսյանի խոսքով էլ՝ ժողովրդից թալանվածը մեծ դժվարությամբ է հետ վերադարձվում, քանի որ իրավապահ մարմինները երբեմն անգործություն են ցուցաբերում:

Վարուժան Հոկտանյանը նշում է՝ շատ կարևոր է, թե, մասնավորապես, ԱԱԾ-ում հարուցված քրգործն ի՞նչ ելք կունենա: Ըստ նրա՝ եթե առանձնատան վաճառքի գործարքը համարվի օրինական, ապա «կանաչ լույս» կվառվի մյուս անօրինական տների վաճառքի համար:

Ուշագրավ է, որ մինչ Դատախազությունը բարձրաձայնում է, որ Աբրահամյանների առանձնատան վաճառքի գործարքն այս փուլում անթույլատրելի էր, ՊՎԾ պետ Ռոմանոս Պետրոսյանը Factor TV-ի հարցին ի պատասխան՝ հայտարարում է, թե այդ գործարքում անօրինական ոչինչ չկա:

Մանրամասները՝ տեսանյութում։

Նարեկ Կիրակոսյան