Բաքուն պատասխանել է ՀՀ ԱԳՆ-ի՝ Արցախում բնական գազի մատակարարման խափանման մասին հայտարարությանը

Պաշտոնական Բաքուն արձագանքել է ՀՀ ԱԳՆ-ի՝ Ադրբեջանի կողմից Արցախում հումանիտար ճգնաժամ ստեղծելուն ուղղված գործողությունների վերաբերյալ հայտարարությանը։ Մասնավորապես, ՀՀ ԱԳՆ նշել էր, որ ադրբեջանական կողմի ակնհայտ միջամտությամբ Շուշի քաղաքի մոտակայքում՝ ադրբեջանական վերահսկողության տակ գտնվող տարածքում, կրկին խափանվել է Հայաստանից բնական գազի մատակարարումը Լեռնային Ղարաբաղ:

«Բացի Լեռնային Ղարաբաղի բնակչության նկատմամբ հոգեբանական ճնշում գործադրելուն ուղղված իր մյուս շարունակական գործողություններից և Լեռնային Ղարաբաղ միջազգային հումանիտար կառույցների մուտքը խոչընդոտելուց, Ադրբեջանը միտումնավոր կերպով խաթարում է Լեռնային Ղարաբաղում կենսական նշանակություն ունեցող ենթակառուցվածքների բնականոն աշխատանքը, ինչն ակնհայտորեն հանգեցնում է Լեռնային Ղարաբաղում հումանիտար ճգնաժամի ստեղծմանը։ Անթույլատրելի ենք համարում արցախահայության նկատմամբ սիստեմատիկ բռնության այս աղաղակող քաղաքականությունը»,-ասվում էր հայտարարության մեջ։

Ադրբեջանական լրատվամիջոցների հաղորդմամբ՝ Ադրբեջանի ԱԳՆ մամուլի ծառայության բաժնի ղեկավար Լեյլա Աբդուլլաևան նշել է, որ, իբր, Հայաստանը «փորձում է միջամտել Ադրբեջանի ներքին գործերին»։

«Հայաստանի ԱԳՆ-ն մի քանի օր առաջ փորձում էր միջամտել Բաքվի ներքին գործերին ՝մեկնաբանելով միջազգային կազմակերպությունների մասնակցությունը Ադրբեջանի տարածքում միջացառմանը, և հիմա փորձում է դա անել այլ թեմայով»,-ասել է Աբդուլլաևան։

«Մենք խորհուրդ ենք տալիս Հայաստանին անհիմն ու անօրինական պահաջներ ներկայացնելու փոխարեն զբաղվել պարտավորություններով, որոնք բխում են եռակողմ հայտարարությունից ու ապահովել տարածաշրջանում մնացած իր զինված ուժերի դուրսբերումը»,- հայտարարել է պաշտոնյան։ Այսուհանդերձ, իր չհիմնավորված հայտարարություններում Աբդուլլաևան որևէ կերպ չի անդրադարձել Արցախում Ադրբեջանի կողմից բնական գազի մատակարարման միտումնավոր ընդհատման պատճառներին ու հետևանքներին։

Էմմա Չոբանյան