Ինչքան նոր մահեր են անհրաժեշտ, որ Ուկրաինայի երկնքի փակումն ապահովվի․ Զելենսկի․ ՏԵՍԱՆՅՈՒԹ

Ուկրաինայի նախագահ Վլադիմիր Զելենսկին այսօր հերթական տեսաուղերձն է հղել. Նա կրկին կոչ է արել արեւմտյան երկրներին օգնել Ուկրաինային պաշտպանվել երկնքից։
«Մեր դրոշի վրա արյուն չկա: Չկան և երբեք չեն լինի սև կետեր, սվաստիկաներ: Ուկրաինայի դրոշը հողն է: Խաղաղ, պարարտ, ոսկեգույն և առանց տանկերի: Այս երկինքը խաղաղ է, պարզ, կապույտ և առանց հրթիռների: Այդպես է եղել, այդպես էլ կլինի»,- ասել է Ուկրաինայի ղեկավարը։

Միաժամանակ նա հայտարարել է, որ խաղաղ ուկրաինացիներն արժանի են, որ երկինքը փակվի թշնամու հրթիռներից։

«Ինչքան նոր մահեր և կորուստներ են անհրաժեշտ Ուկրաինայի երկինքը փրկելու համար, ինչո՞վ են խաղաղ մարդիկ Խարկովում կամ Նիկոլաևում տարբերվում Համբուրգում կամ Վիեննայում ապրողներից, մենք սպասում ենք որոշման։ Մաքրել երկինքը․կա՛մ ուժով, որը դուք ունեք, կա՛մ դուք մեզ կտաք մարտական ինքնաթիռներ և հակաօդային պաշտպանության միջոցներ, որոնք մեզ կտան անհրաժեշտ ուժը: Սա այն օգնությունն է, որը աշխարհը պետք է տրամադրի ոչ միայն Ուկրաինային, այլև ինքն իրեն՝ ապացուցելու, որ մարդկությունը հաղթելու է։ Որքան հնարավոր է շուտ»,- ասել է պետության ղեկավարը։

Նախագահը նաև տեղեկացրել է, որ բանակցություններ է վարել Լեհաստանի նախագահ Անջեյ Դուդայի, Մեծ Բրիտանիայի վարչապետ Բորիս Ջոնսոնի, Իտալիայի վարչապետ Մարիո Դրագիի, Ֆրանսիայի նախագահ Էմանուել Մակրոնի և Հնդկաստանի վարչապետ Մոդիի հետ։ Նա նրանց կոչ է արել նոր պատժամիջոցներ կիրառել Ռուսաստանի Դաշնության դեմ։

Այնուհետև Ուկրաինայի ղեկավարը խոսել է Նիկոլաևի և Խարկովի բնակելի թաղամասերում գիշերային հարվածների մասին։ Նա հայտարարել է, որ ռուսական զորքերը պատանդ են պահում Իրպինի, Բուչայի, Գոստոմելի և գրավված այլ քաղաքների բնակիչներին

Մանրամասները՝ տեսանյութում

Տաթև Ֆռանգյան