20.04.2026 | 23:38
Ովքեր են «Հանրապետություն» կուսակցության ցուցակում․ հրապարակվել են առաջին 30 անունները
Լեզու գտնելու 2-րդ փորձը․ ռուս-ուկրաինական բանակցությունների հերթական փուլը սպասվում է այսօր․ ՏԵՍԱՆՅՈՒԹ
Քաղաքականություն
02.03.2022 | 15:58
Ուկրաինայի նախագահի գրասենյակի ղեկավարի խորհրդական Ալեքսեյ Արեստովիչը հաստատել է, որ Ռուսաստանի հետ բանակցությունների երկրորդ փուլը տեղի կունենա այսօր երեկոյան, հաղորդում է BBC-ի ռուսական ծառայությունը։
Նշվում է, որ պատվիրակությունների կազմը չի փոխվի։
Մինչ այդ, սակայն, Ուկրաինայի ԱԳ նախարար Դմիտրի Կուլեբան հայտարարել էր, որ չգիտի, թե երբ կկայանա բանակցությունների հաջորդ փուլը։
Ավելի վաղ Կրեմլի խոսնակ Դմիտրի Պեսկովն ասել էր, որ Ռուսաստանի պատվիրակությունը չորեքշաբթի օրվա երկրորդ կեսին կսպասի ուկրաինական պատվիրակությանը՝ բանակցությունները շարունակելու համար։
«Այսօր օրվա երկրորդ կեսին՝ երեկոյին մոտ, մեր պատվիրակությունը տեղում կսպասի ուկրաինացի բանակցողներին։ Մեր պատվիրակությունն այսօր երեկոյան պատրաստ կլինի շարունակել զրույցը»,- ասել էր Պեսկովը՝ չհստակեցնելով բանակցությունների վայրը։
Մինչդեռ ՌԴ նախագահի օգնական Վլադիմիր Մեդինսկին, որը բանակցությունների առաջին փուլում գլխավորում էր ռուսական պատվիրակությունը, հայտարարել էր, որ հաջորդ հանդիպումը տեղի կունենա լեհ-բելառուսական սահմանին։
Հիշեցնենք՝ բանակցությունների առաջին փուլը տեղի է ունեցել փետրվարի 28-ին։
