10.10.2026 | 21:37
Կանանց Հայաստանի հավաքականը ոչ-ոքի խաղաց Ինդոնեզիայի հետ
Քաղաքական դիակի հետ չեն երկխոսում, Սերժ Սարգսյանը քաղաքական դիակ է. Նիկոլ Փաշինյան. ՏԵՍԱՆՅՈՒԹ
Քաղաքականություն
20.04.2018 | 22:44
«Պարզապես ծիծաղելի է, որ Սերժ Սարգսյանի մահամերձ կամ մահացած իշխանությունը մեզ երկխոսության կոչ է անում։ Քաղաքական դիակի հետ չենք երկխոսում։ Սերժ Սարգսյանը քաղաքական դիակ է։ Հայաստանի իշխանությունը պատկանում է Հայաստանի ժողովրդին», – այսօր Հանրապետության հրապարակում ունեցած ելույթում հայտարարեց ԱԺ «Ելք» խմբակցության ղեկավար, «Քաղաքացիական պայմանագիր» կուսակցության վարչության անդամ Նիկոլ Փաշինյանը։
Նիկոլ Փաշինյանն, այնուամենայնիվ, ասաց՝ դա չի նշանակում, թե իրենք պատրաստ չեն որևէ քննարկում ունենալ։ «Մենք պատրաստ ենք քննարկել Սերժ Սարգսյանի հեռացման հրաժարականի ժամկետները և դրա հետ կապված որոշ պայմաններ։ Ես պատրաստ եմ ասել՝ մենք ընդհանրապես վրեժխնդրություն չենք ուզում։ Եվ եթե Սերժ Սարգսյանը օր առաջ բացի իր աչքերը և հրաժարական տա, դա միայն ու միայն օգուտ կբերի նրան ու Հայաստանի Հանրապետությանը», – ընդգծեց ընդդիմադիր շարժման առաջնորդը:
Փաշինյանը մանրամասներ ներկայացրեց նաև իրենց պատկերացրած հետագա զարգացումներից:
«Սերժ Սարգսյանը հրաժարական է տալիս վարչապետի պաշտոնից: Ազգային ժողովը վարչապետ է ընտրում ժողովրդի թեկնածուին, ձևավորվում է ժամանակավոր կառավարություն, Հայաստանի Հանրապետության օրենսդրությամբ՝ վարչապետ նշանակվելուց հետո քսան օր անց խորհրդարանը պետք է հավանություն տա կառավարության ծրագրին: Երբ ձևավորվում է ժամանակավոր կառավարություն, քաղաքական պայմանավորվածության համաձայն՝ ԱԺ-ն չի ընդունում կառավարության ծրագիրը, ինչից հետո իրավունքի ուժով տեղի են ունենում արտահերթ խորհրդարանական ընտրություններ»:
Ընդդիմադիր գործիչն ասաց՝ պատրաստ են Հանրապետականի հետ քննարկել նշված կետերը:
Ելույթն ամբողջությամբ՝ տեսանյութում:
