Ինչ քայլեր կանի ԱՄՆ-ը․ զսպող ուժերը մարտական հերթապահության ռեժիմի բերելու՝ Պուտինի որոշման արձագանքը․ ՏԵՍԱՆՅՈՒԹ

ՌԴ նախագահ Վլադիմիր Պուտինը հանձնարարել է ռուսական բանակի զսպող ուժերը մարտական հերթապահության հատուկ ռեժիմի բերել։

Կրեմլում պաշտպանության նախարար Սերգեյ Շոյգուի և ՌԴ ԶՈւ գլխավոր շտաբի պետ Վալերի Գերասիմովի հետ հանդիպմանը Պուտինն ասել է, մեջբերում եմ՝ «ՆԱՏՕ-ի առաջատար երկրների բարձրաստիճան պաշտոնյաները նույնպես թույլ են տալիս ագրեսիվ հայտարարություններ անել մեր երկրի դեմ, ուստի պաշտպանության նախարարին և գլխավոր շտաբի պետին հանձնարարում եմ ռուսական բանակի զսպիչ ուժերը բերել մարտական ​​հերթապահության հատուկ ռեժիմի»։

Պուտինն արևմտյան երկրներին մեղադրել է նաև տնտեսական ոլորտում Ռուսաստանի դեմ ոչ բարեկամական գործողությունների մեջ՝ սահմանված պատժամիջոցները «ոչ լեգիտիմ» որակելով։

Նշենք, որ ռուսական Ռազմավարական զսպման ուժերը ներառում են Ռազմավարական հարձակողական և Ռազմավարական պաշտպանական ուժերը: Ռազմավարական հարձակողական ուժերի հիմքը Ռազմավարական միջուկային ուժերն են, որոնք ներառում են ռազմավարական նշանակության Հրթիռային ուժերը՝ միջմայրցամաքային հեռահարության հրթիռային և ավիացիոն համակարգերը։

Պուտինի այս հրամանին արձագանքել է Միացյալ Նահանգները։ Սպիտակ տան խոսնակ Ջեն Փսաքին հայտարարել է, որ Ռուսաստանի միջուկային զսպման միջոցները մարտական հերթապահության ռեժիմի բերելու մասին որոշումը «գոյություն չունեցող սպառնալիքներ ստեղծելու» շարունակությունն է՝ «հետագա ագրեսիան արդարացնելու համար»։

Պենտագոնի բարձրաստիճան պաշտոնյան էլ այս որոշումն անհարկի քայլ է համարել՝ նշելով, որ ՆԱՏՕ-ն, ինչպես նաև Ուկրաինան Ռուսաստանին երբեք չեն սպառնացել։ Նա հավելել է, որ «ԱՄՆ-ն կարողանում է պաշտպանել իրեն, դաշնակիցներին ու գործընկերներին»։

Մանրամասները՝ տեսանյութում։