09.02.2026 | 20:45
Շնորհակալություն եմ հայտնել Վենսին իր անձնական ներդրման համար․ Փաշինյան. ՏԵՍԱՆՅՈՒԹ
Ալիևը դարձյալ խոսել է Ադրբեջանի ու Հայաստանի միջև խաղաղության համաձայնագրից
Քաղաքականություն
14.02.2022 | 13:00
Ադրբեջանի նախագահ Իլհամ Ալիևը կնոջ՝ Մեհրիբան Ալիևայի հետ նախօրեին այցելել է ադրբեջանական վերահսկողության տակ գտնվող Ակնա, հայտնում են տեղական լրատվամիջոցները։ Նշվում է, որ Ալիևները մասնակցել են «Աղդամ-1», «Աղդամ-2» էլեկտրաէներգայի ենթակայանների բացմանը։ Ադրբեջանի նախագահը նաև հանդես է եկել մի շարք քաղաքական հայտարարություններով։ Նա, մասնավորապես, նշել է, որ Երևանի ու Բաքվի միջև պետք է լինի խաղաղության համաձայնագիր։
«Իհարկե, Հայաստանի ու Ադրբեջանի միջև պետք է լինի խաղաղության համաձայնագիր։ Այդ համաձայնագիրը պետք է ստորագրվի միջազգային իրավունքի նորմերի ու սկզբունքների հիման վրա՝ երկրների տարածքային ամբողջականության ճանաչման փոխադարձ սկզբունքով»,-ասել է Ալիևը։
Բացի այդ նա նաև Հայաստանի ու հայ ժողովրդի հասցեին անհիմն մեղադրանքներ է հնչեցրել ու կրկին սպառնացել։ Ալիևը համոզմունք է հայտնել, որ այն աշխատանքը, որը հիմա տանում է Ադրբեջանը ռազմական շինարարության ոլորտում էլ ավելի է ուժեղացնելու երկիրը ու «պատասխանն է Հայաստանի ռևանշիստական ուժերին»։
Բացի այդ Ալիևը նշել է, որ Ադրբեջանը շարունակելու է կազմակերպել արտասահմանցիների այցը Ակնա։ Նշենք, որ Ադրբեջանը պարբերաբար գումարի դիմաց տարբեր երկրների լրագրողների ու փորձագետների քարոզչական այցեր է կազմակերպում Արցախի գրավյալ տարածքներ։
Էմմա Չոբանյան
